Tang 400 ngut u Khasi ha Mawbah da ki hajar na kiwei pat ki jaidbynriew

Syllad | The Rising MeghalayaMay 26, 2023

Ka Khasi Hills Autonomous District Council (KHADC) ka la lap ba ha Mawbah ki don shibun bah ki bar jylla kiba sah beaiñ khlem ki kot ki sla kiba biang.

U CEM, KHADC u bah Titosstarwell Chyne haba kren bad ki nongthoh khubor haka sngi Plaie, ula iathuh ba u Acting Rangbah Shnong ka Mawbah u la pyntip ba ha Mawbah, kaba hap hapoh ka West Shillong, 6000 ngut ki bar jylla kiba shong ba sah kim don satia ia ki kot ki sla, katba 8000 ngut pat kidei kiba don ia ka EPIC, bad ki Khasi kiba shong ba sah ha katei ka shnong ki don tang 400 ngut.

Ula CEM ula iathuh ba la lum iaka jingialang ki nongialam shnong jong ka sor Shillong ban khanglad iaka jingwan buhai shnong ki briew kiba nabar hapoh u pud u ang ka konsil.

Ha kajuh ka por, une u khlieh jong ka KHADC ula pynpaw iaka jingsngewkhia ba ki don ki poiwir ba wan na Manipur kiba la shu jah rngai na ka jaka sah shipor na Madanrting, bad la suba kine ki briew ki la phet sha kiwei ki shnong Khasi kiba don ha u pud u sam jong ka district council.

U la iathuh shuh shuh ba u Rangbah Shnong ka Madanrting u la pyntip ba ka dorbar shnong kam don jingtip eiei ia ka jingwan ki powir na Manipur, namar ki la wan lyngba kawei ka kynhun niam. Ula iathuh ba mynta ki jaidbynriew Manipur kiba poiwir ha katei ka shnong ki don sa 32 ïing, katba da ki spah ngut ki la shu jah rngai.

U la ong ba na ka liang ka council ka la bthah ia ki rangbah shnong ha kin long kiba peitngor iaka jingwan buhai shnong ki briew kiba na shabar. 

Ka konsil kan pynmih da ka jingpynbna kaba bthah iaki dorbar shnong kidei ban pynrung kyrteng beit ia baroh kiba wan shong wai ha ki shnong ki thaw, kynthup ia ki Khasi.

Uba Chyne u la kyntu ruh ia ka Sorkar Jylla ba kan thaw ia ka jaka sah shipor iaki poiwir ba Manipur, bad ban pynthikna pat ba ki dei ban leit phai biang sha la ki shnong hadien ba ka shong suk shong sain ka la wanphai biang ha ka Jylla Manipur.