Tang da ka jingiaryngkat yn lah ban jop ïa ka jingpang AIDS

Syllad | The Rising MeghalayaDecember 2, 2022

Ryngkat bad ka pyrthei baroh kawei, ka Society for Urban and Rural Empowerment (SURE) lyngba ka project Link Worker Scheme (LWS) kaba la kyrshan da ka Meghalaya Aids Control Society (MACS) kala rakhe iaka World AIDS Day haka sngi Nyngkong.

Iaka World AIDS la rakhe manla ka 1 tarik u Nohprah ha satlak ki ri ka pyrthei ban ialap shaphang ban iada iaka jingpang AIDS kaba saphriang na ka jingpang HIV.

Katba nang ïaid ki sngi, ka jingpang AIDS kala pur sha ki jaka sor bad kumjuh ruh sha ki nongkyndong. Haka jylla Meghalaya ruh ka jingbun jong ki briew kiba bit ïa kane ka jingpang kala nangkiew bad ha kaba ïadei bad kane ka sorkar kala shim ïa kiba bun ki lad ban tem ïa kane ka jingeh bad ka skhim LWS ka dei kawei na kita ki skhim.

Ka SURE kala rakhe iaka World AIDS Day haka sngi Palei haka hall jong ka HK Singh Memorial Secondary School, ha ryngkat ka jingïatreilang jong ka ophis jong u Headmaster jong kane ka skul.

Ïa ka jingïalang ban ai jingtip bad jingsngewthuh (awareness) shaphang kane ka jingpang la pynïaid da ka kong Niwanka L. Shylla kaba long ka Zonal Supervisor jong kane ka project LWS jong ka SURE. La ïoh nyngkong ïaka jingkren na u ma Teiborlang Passah uba long u Headmaster jong ka school HK Singh Seondary School uba la pynpaw ïa ka jingsngewnguh ba ka SURE kala pynlong ïakane ka jingpynshai paidbah hapoh ka skul bad u kyrmen ba ki khynnah skul kin ïoh jingmyntoi shikatdei eh na kane ka prokram. Ha kane ka sngi la ïoh ruh ïaka jingkren na u Dr. H.H.Mohrmen uba long u Secretary jong ka SURE halor ka matpdeng jong ka jingpyndonburom kaba kren shaping ka jingdonkam jong ka jingsngewthuh ïa ka jingling-ïaryngkat (equalize). Ula ong ba ka pyrthei kan ym lah satia ban jop ïa kane ka jingpang katba ym pat don ka jingïaryngkat haka longbriew ka manbriew. Ka jingñew ne burom ïaryngkat jong ki nongpang HIV/AIDS bad kiwei pat ki nongshong shnong ka dei kaba kongsan tam.

Haka jingpynshai shaphang kane ka sngi, ka Coriniki Slong kaba long ka District Resource Person (DRP) jong ka LWS project kala ban khia ba ka jingdawa kaba hakhmat eh mynta ka long ban hikai ïa ki paidbah ba kim dei ban leh kyndiah ne kyntait ne ban ibeiñ, ñiew beinñ (discrimination and stigmatization) ïa ki paralok kiba im ryngkat bad une u jingpang (people living with HIV AIDS). Kala ong ruh ba kiba bun hi ki briew kila tip shaphang u khniang HIV, ka jingpang AIDS bad kumno kane ka jingpang ka ïabit, hynrei kaba sngewsih ka long ba ka don ka jingshah kyntait, ka jingshah ibeiñ, ñiew beiñ jong ki nongpang ha ki paranongshong shnong. Ka kong Slong ka ong ruh ba ka long kaba phylla ba haba ki briew ki ïohpang da kiwei pat ki jingpang kum ka jingpang bampong bad kiwei kiwei, ki paralok ki sngew synei ïa ki nongpang, pynban ïa kiba pang HIV AIDS pat ki briew ki ñiew beiñ bad kheiñ poh.

Kiwei pat kiba la ai jingkren ha kane ka sngi ki dei u Comfort Challam bad ka Dakapaka Shullai kiba long ki Link Worker jong ka SURE.