Tang ha ka Seng VPP ngi kyrmen ban wanrah jingkylla; President ka Narpuh Circle

Syllad | The Rising MeghalayaSeptember 30, 2023

Ka President jong ka Seng Voice of the People Party (VPP), Narpuh Circle ka Kong Deiwi  ka la ong ba hapdeng ka jingduh jingkyrmen hynrei u Blei u la sei ia ka Seng VPP hapoh ka jingialam jong u Bah Ardent Miller Basaiawmoit ha kaba la iohi pat ia ka jingkyrmen na ka bynta ka lawei jong ka ri bad ka jaidbynriew lyngba ka jingsynshar kaba khuid.

Ia kane ka la pynpaw haba kren ha ka jingialang pynskhem ia ki nongkitkam ba pura jong ka party hapoh Narpuh Constituency ia kaba la tip kum ka VPP Narpuh Circle ha ka jingialang kaba la long hynnin ka sngi Thohdieng ha Community Hall ka Dorbar Shnong Lumshnong.

Ha kane ka sngi la ia don lang ruh u MLA ka Mawlai constituency u Bah Brightstarwell Marbaniang bad kiwei pat ki nongialam ka party kumjuh ki nongshong shnong jong ka thaiñ Narpuh.

Ia ki nongkitkam la pynskhem da u Organizing Secretary ka VPP East Jaiñtia Hills u Ma Damewanhi Rymbai ha kaba la jied ia I Kong Deiwi Tongper kum ka President ka VPP, Narpuh Circle.

Na ka liang u Bah Bright MLA ka Mawlai u la ai ka jingkren kyntu kynpham bad ai mynsiem bad kyrkhu kyrdoh ruh ia kane ka Circle ba kan iaineh skhem bad kan lah ban iaid shaphrang ha ki kam ki jam jong ka party bad ban kyntiew ia ka thaiñ bad ia ka ri bad jaidbynriew hi baroh kawei.

Kiwei pat ki nongkitkam ka party ki kynthup ia u Vice-President Ma Yoomiky Kyndait, General Secretary  Dauniki Dhar, Asst Secretary Spaiñlin Nongrum, Organising Secretary Keldrim Sumer, Finance Secretary Kong Finzy Mary Ksih, Treasurer Kong Hutmon Dhar kynthup ia 8 ngut ki executive members bad nalor ki spah ngut ki dkhot kiba wan na kylleng ki shnong ka thaiñ Narpuh.