Tang hapoh 12 sngi shah pynher krad haduh 2500 ngut ki nongtrei bylla bar jylla ba wan rung beain

Syllad | The Rising MeghalayaJuly 17, 2024

Ka Khasi Students’s Union (KSU) ka la pynher krad noh haduh palat 2500 ngut ki nongtrei bylla bar Jylla kiba wan rung beain sha kane ka Jylla khlem ki kot ki sla kiba biang, kata ha ka jingkhynra labour licence bad work permit ha ki jaka pyntrei bapher bapher hapoh Rilum Khasi Jaintia naduh kine ki khatar sngi kiba la dep.

Ia kane la pyntip da u President ka KSU u samla Lambokstarwell Marngar ha ka jingrakhe ia ka lyngkhuh sngi iap ba 189 snem jong u nongialeh laitluid ka jaidbynriew u Tirot Sing Syiem uba la iakhun pyrshah ia ka sorkar Bilat kaba la long ha ka 17 tarik Natung ha ka nongbah Shillong.

U samla Lambokstar u la pynbna ruh ia ka rai jong ka seng ban nangpynjur shuh shuh ia ki jingkhynra shibynta ban pynpaw pyrshah ia ka jingbym lah jong ka sorkar Jylla ban pyntreikam ia ki ain kiba la don lypa ha ka Jylla, kata kynthup ia ka Meghalaya Residents Safety and Security Act (MRSSA), 2016 nalor ka jingpynbor ia ka sorkar Pdeng ba kan pyntreikam noh ia ka Inner Line Permit (ILP) khnang ban pyrkhing ia ka jingwan rung kynthep ki bar Jylla sha kane ka Jylla.

U la ong ruh ba ka KSU shen kan sa iakynduh bad kiwei pat ki para Sengbhalang ban shim ia ki rai halor kiwei pat ki sienjam kiba iaei bad kane ka mat kaba kongsan.

Haba kren ha ka jingialang une u nongialam ka KSU u la ong ruh, “Ngin iai bteng ban pynjur ia ka jingkhynra ia ki kot ki sla jong ki nongbylla bar jylla wat hapdeng ki jingkem jong ki pulit ia ki dkhot jong ka Seng.

“Haduh palat 2500 ngut ki nongtrei bylla bar jylla la shem ba ki la wan bylla khlem ki kot ki sla kiba biang. Ka jingkylli ka long la ki dei ne em ki nongshong shnong ka India,” u la ong da kaba bynrap, “Ngi kwah ruh ban tip ba haduh katno tylli ki case ka sorkar ka la dep ban mudui ia kiba kum kine ki nongtrei bar jylla kiba khlem kot khlem sla bad kaei kaba ki la leh pyrshah ia kito ki kontraktor kiba pynkhein ain.”

“Ha ka jingshisha, ngi la pyrshang ban shu iarap lem ia ka sorkar ban lah ban pyntreikam ia ki kyndon ain kiba la don lypa, hynrei ngi la shah kynnoh pynban ba ngi la shim ia ka ain ha la ka jong ka kti. Ka KSU lem bad kiwei pat ki Sengbhalang ki la shah pynbor ban shim ia ki sienjam khnang ba kan long ka jingkyrsiew thiah na ka bynta ka sorkar Jylla,” ong u samla Marngar.

“Da kaba pynpaw ba ka don ka jingbym ia sngewthuh kaba khraw, une u nongialam ka KSU u la ong ba watla u Myntri Rangbah ka Jylla u la kam ba ka Work Permit kam don satia hynrei ka Sorkar Jylla ha u snem 2011 ka la wanrah ia ka amendment ia ka Meghalaya Inter-State Migrant Workmen (Regulation of Employment and Condition of Service) Rules, 2011 na ka bynta ban thung haduh 39 ngut ki Labour Inspector ki ban shimti ban khmih halor ka jingwan rung kynthep jong ki bar Jylla.

“Ngi la iohi ruh ia ka The Meghalaya Identification, Registration (Safety & Security) of Migrant Workers Act, 2020 ba la mynjur da ka sorkar Jylla. Ka don ka jingklumar jingmut namar ngim tip shuh kano kaba dei bad kane kaba lait,” u la ong da kaba bynrap, “Ba dei na kata ka daw ngi la ong ba ha ka jaka ban pynkhlain ia ki ain kiba la don lypa, ka sorkar ka pyrshang pynban ban pynduh noh ia ki, ka sorkar ka la pulom pura ban pyntreikam ia kine ki ain kiba la don lypa.”

“Lada ngi dei ki bym ioh bor ban pynlong ia ki jingkhynra balei pat ba ka sorkar kaba don ia ka bor ban leh kam shym la leh ei ei halor kane ka phang? Ngi la sakhi dang shen ba hynriew ngut ki nong Bangladesh la ioh kem na Shillong bad ka jingkylli ka mih ba kumno kine ki briew ki ioh ban rung sha u pud u sam jong ngi? Kane ka pyni ia ka jingtlot jong ka sorkar bad ka buh ia ka jingma kaba khraw ia ki paid riewlum ka jylla lada kim kyndit noh na ka jingiohthiah,” u la ong.

Nalor kata u samla Lambokstar u la ther tyngeh ruh ia ka sorkar Jylla halor ka jingpyndik ia ki dkhot jong ka Seng da kaba hukum ia ki pulit ban leit kem ia ki ha ka por mynmiet myniong.

“Haba kylli ki pulit ki la kam ba kadei ka hukum jong kiba halor, hynrei ngi tip ba ka jingbthah hi ka la wan na ka Sorkar. Nga kwah ban ong hangne ba ka jinglong Myntri lane nongmihkhmat kam dei satia ka kam kaba neh shyrta, hynrei ka dei tang ka kam kontrak kaba tang san snem. Namar kata ki rit ki ria ruh ki don la ka jong ka bynta ban leh bad ka por hi kan sa batai halor kane,” u la ong.

“Kumta ruh ngin sa rai halor ki sienjam kiba ngin shim nangne shakhmat, hynrei kane ka jingkhynra hi kan iai bteng wat hapdeng ki jingpyntieng pynsmiej jong ka sorkar,” u la bynrap.