Tang Ka Dien Rung Suda, Katba Ka Dien Mih Pat Ymdon

Nangai SutngaJuly 19, 2020

Nga poi kynmaw khliak ïa kine ki kyntien jong u Myrsiang haka jingiathuh khana shaphang u Sing bad u Myrsiang ïa kaba la thoh haka kot Ki Phawer U Aesop. Ha kato ka khana la ong ba u Sing namar ba u kwah bam suk kumta u la pynbna ba u pang bad la jan ïap khnang ban wan peit ki khun ki raïot ban wan kitbok la u nongsynshar. Hynrei kat kiba wanpeit kim ju leit phai shuh. Kumta ynda la wan jngoh u Myrsiang bad u la kylli ïa u Sing tang na shabar ka krem, te u Sing u la ong “Balei me kylli tang nabar haba baroh baroh ki ïa rung shapoh”. Te u Myrsiang ula jubab “Hooid Syiem kadei kata, hynrei nga u ba rit bor te nga tieng, namarba nga ïohi tang ka dien rung suda katba ka dien mih pat te ymdon”. Kine ki kyntien jong u Myrsiang kiba u la pynphai nia ïa u Sing ki pynkynmaw ïa nga bad ka pyllong ïa nga ruh ban pynwandur ïa kine ki kyntien jong u Myrsiang bad kane ka jingwan hiar wanhap u Mynder mynta shapoh ka Jylla jong ngi.

Hooid lada sngap ïa ka khana ka lah ban long da kumwei pat ka jingmut lane kam ïahap sbak ruh bad kane ka jingthoh ka jong nga, hynrei nga shim hangne thik tang ïa kitei ki kyntien jong u Myrsiang bad ngan pynwandur ïa ki bad kane ka jingwantuid  ba shyrkhei ki Bar Jylla shapoh ka jylla jong ngi khamtam hapoh ka Bri U Hynniewtrep. Kumta da kaba shim ïa kitei ki kyntien jong u Myrsiang,  la pyllong ïa nga ban thoh eiei shaphang kane ka bynta ne ka phang da kaba pyrkhat ba ïoh lehse kan long ka jingpynkyrsiew thiah iaki paradoh parasnam jong ngi bad khamtam ba kin long kiba husiar bha naka bynta ban nymshah tyllep ha u Mynder shi sngi.

Haba nga thoh shaphang kane ka bynta, ne shaphang ka jingma kaba ap naka jingwan tuid u Mynder u lyngkieñ shapoh ka Jylla jong ngi, don lehse kiba mut ianga kum uta u nong pynïashrut ne pynïapher jaitbynriew. Hynrei kam long kumta, kane ka jingthoh jong nga ka long tang ban ïa pyni pynkdew ne ïa sneng ïa kraw  ïa la ki doh ki snam jong ngi ba kin long kita kiba tip ban sumar ne husiar na kiwei pat ki jaitbynriew kiba ngi ïohi ba katba nangmih ki sngi ki nang jyllei nang jyllei hapoh kane ka Ri baieid jong ngi.  Ka long kumba u kpa u maham iaki khun ban buh bha ne sumar bha iaka doh ban buh haka jingbuh kaba lait naka jingshah bam haka miaw ne ki ksew. Lada ngim sumar ne buh bha ïa ka doh, khlempep u ksew ne ka miaw kin wan ban bamsuk ïa ka bad don ruh ki khep kaba ngi la buh bha ngi kum klet ban khang ka duli hangta u ksew ne ka miaw kin ïoh ban tuh. Kane ka jingthoh jong nga ruh ka long thik tang ban kyntu ïa la ki paradoh parasnam ban sumar ne husiar bha ïa la ka Ri bad ka Jaitbynriew khnang ba u nongwei u nonghap un nym ïoh rah ne bamduh ïa ka.

Hooid, baroh shi katto ngi la ïohi ïa ka jingïakhih ki Sengbhalang ka Bri U Hynniewtrep halor ka jingïohlad jong ki Bar Jylla ban wanrung shapoh ka Ri Khasi jong ngi. Hooid ngi lah ïohi shisha ïa ka jingwan buhai shnong ki bar jylla na kylleng ka Ri India shapoh kane ka Ri Khasi jong ngi. Ymtang napoh ka Ri India, hynrei ngi sakhi ba wat nabar ka Ri India ruh ki ïa wantuid bha shapoh kane ka Jylla jong ngi. Ngi la ïohi ba ki don da ki hajar hajar ngut ki Khar Nepali ba dei na Ri Nepal kiba wan buhai shnong ha Jylla jong ngi, nangta ki Khar Bangladesh bad wat ki Jaitbynriew Negro ki la sdang jylla bha hapoh sor Shillong. Kumba la ïohi dang hakine ki khyndiat bnai ba la dep ba ki pulit ka East Jaintia ki la ïohkem da ki phew ngut ki Dohïong kiba mut ban wan buhai shnong shapoh ka Jylla jong ngi. Wat ki para Riewlum ruh kum ki Mizo, Naga, Manipuri bad kiwei kiwei pat, la iohi ba ki la ïa sdang jyllei hapoh ka Jylla jong ngi da kaba shimkabu ïa ka jingwan wad jingstad bad ha lyndet pat ban ïoh sengkam sengjam bad ban ïoh knieh ïa ka pliang ja u Khasi jong ngi. Ki jaitbynriew Nepali lei lyngba ka ain Indo-Nepal Treaty 1950 ki la shim kabu shaba palat da kaba ki la wantuid wan hap da ki hajar hajar ngut bad la ïohi ruh ba ki la kylla trai shnong syndon ha kino kino ki jaka kaba ki shong. Mynta lah ban ïohi ïa ki ha kylleng ki jaka ba bri u Hynniewtrep kum sha Langpih, Ri Bhoi , Shillong, bad sha ki Thain dewïong kiba don ha Jaintia Hills. Ki Jaidbynriew Nepali ki la don kiba nud ban shimkur ne ai jait Khasi bad ki nud wat ban thaw kur thymmai ruh khlem ka jingkheiñ Kur na ka kpoh ba la mih. Nangta la ïohi ruh ba ka JHADC ha u snem 2014 lyngba ka shithi  dated:Jowai, 30th May, 2014, No: JHADC/POL/9/2014  ka la  hap ban pynmih ïa ka hukum ban phah weng ia ka jingkam Waheh Shnong u wei u Khar Nepali hakawei ka jaka kaba tip kum ka Umthe, Elaka Sutnga uba la kam Waheh Shnong jubor ïa lade.

Ka jingjur ka jingwan buhai shnong ki mynder shapoh ka Jylla jong ngi ka dei namarba ha la Jylla jong ngi ki suk bha  ban sengkam sengjam khamtam haka kam khaïi ka pateng, nangta ka jingbymdon ki kynhun pyntriem kum sha Manipur bad Nagaland, bad ka jingbymdon ki aiñ kiba khlaiñ ki ban tehlakam ïa ka jingïoh wan rung suk ki bar Jylla shapoh ka Jylla jong ngi kum ka Inner Line Permit bad shibun kiwei pat ki ain ki ba lah ban pynwit pynthud bad long ki jyrwit jyrwat ïa ki bar jylla kiba thmu ban wan buhai shnong shapoh ka Jylla jong ngi. Da ki Million ki phetwir rephuji thma hadien ka jinglaitluid ka India (1947)  ne kito kiba phet na ka daw ka thma 1972 jong ka East Pakistan (ne Bangladesh ba mynta) ki la rung suk da ka jingkyrkhu na Delhi bad ryngkat ka jingïakut ba kin mih noh hadien ka thma. Hynrei pleng, tang ka RUNG ym ka MIH. Ki Bar Jylla Ki Ba La Rung Shane Kim Ia Mih Shuh  Ba La skhem U Khiewja (dukan retail naduh Khanapara, Shillong, Lad Rymbai,  Industry baheh, ter ter)

Ha kane ka Jingkhang dam ne Lockdown ba ladep ngi la ïohi ba ki Trai Jylla jong ngi kiba sah shabar ka Jylla ki la ïa khohreh ban wanphai sha la ka Jylla la jong. La jan man ka sngi ha ki kotkhubor ngi la ïohi ba ki Samla pule bad ki ba trei kiba dei ki doh ki snam jong ngi kiba don shabar ki ïa wan shapoh ka Jylla lajong naka jaka pule ne jaka trei kaba ki don shabar ka Jylla. Hynrei kaba sngewphylla ka long ba ym pat ïohi pat ïa ka jingleit phai ki Bar jylla kiba sah haka Jylla jong ngi watla ka jingkhangdam ka la don la palat 3 bnai eiei ruh.  Wat kito kiba dang shu wanphai ha kane ka Lockdown na shabar ka Jylla ruh ngi ïohi ba ki don bun ki Ki Bar Jylla suda tangba imat kila sah la shong shapoh ka Jylla jong ngi. Man ka sngi nga khmih lynti ba yn mih ka Khubor ha ki Kotkhubor ka ban ong ba don da ki katta katta ngut kiba sahkut haka Jylla jong ngi ha kane ka Lockdown ba ki ïa leitphai sha la ka jong ka Jylla, hynrei phewse ymdon tang kawei ruh, lait tang katto katne ngut ki khynnah pule ka thain shatei lam mihngi hi kiba leitphai.

Wat hapdeng ka Lockdown ruh ngi dang ïohi ba ka don ka jingpyrshang rung jong ki bar Jylla shapoh ka Jylla jong ngi kumba ngi lah ïohi dang shen ha Umsawkhwan Ri Bhoi District, ha kaba don haduh 5 ngut ki Khar Bihari kiba na ka Jylla Bihar kiba wan kyndit  shapoh katei ka Shnong haka 20 Jymmang 2020. Nangta la ïohi ruh ba ha Nongbah Jowai,  kawei na ki dong jong katei ka Nongbah ka la ïohbat  ïa uwei u bar jylla uba wan sha katei ka dong wat hapdeng ka Lockdown ruh. Nangta shuh shuh ngi la ïohi ba bun kiwei kiwei ki shnong hapoh ka Jylla ki la ïohbat ïa ki bar jylla kiba wan ïaid kulmar shapoh ki shnong ki thaw khlem da tip ki wan leh aiu bad trei aiu shane.

Halor kane ka jingwantuid palat ki Nongwei shapoh ka Jylla bad kylla trai shnong syndon ruh haki shnong ki thaw kiba don hapoh ka Jylla jong ngi, U Nongthoh u la pynwandur ïa kane ka jinglong jingman bad kito ki kyntien kren jong u Myrsiang kiba u ong “Satang Ki Dien Rung Suda , Katba ymdon Dien mih pat”. Ngi long tang ki Langbrot lada pyrkhat ha kane ka liang ym kum u SING basian hapoh Krem ba ïoh bam suk. Kyrmen ka Jaidbynriew kan Kyndit bad Ïeng (AWAKE & ARISE)

Kyrpang  ïa phi ki nongpule ïa kane ka jingthoh kaba lyngkot jong nga, nga kyrpad ïa phi ban nymthew ïa ki jingduna jong nga bad nga kloi ban nguhlet katba shong ka nia  hynrei nga da ngeit skhem ba phin pdiang ïa kaei ba nga pashat sha phi lyngba kane jingthoh jong nga bad kyrmen ba kan long kum ka jingpynkyrsiew thiah ïa ngi ki para Khasi khnang ba ka Jaitbynriew jong ngi kan neh kan sah shirta junom.