Tang ka Geological Mapping yn hap pynlut haduh ₹9 lak ban ïoh tih dewiong

Syllad | The Rising MeghalayaFebruary 27, 2020

Ki trai par dewiong ne ki nongkhaii dewiong lada ki kwah ban ïoh tih dewiong, kin hap ban ïoh ïaka license bad ban ioh ïaka License kin hap ban pynbiang ïaka Geological Mapping, Geological Report bad ban pynbiang ïaka Mining Plan bad kiwei kiwei ban ïoh ïaka Clearance naka tnad Environment and Forest ka sorkar.

Kaba nyngkong eh kaba ki trai par bad ki nongkhaii dewiong ki hap ban leh shuwa ban sdang ïaka kam kadei ka Geological Mapping bad kane ka shongdor haduh ₹8 lak 50 hajar haka jaka kaba heh 1.5 square Km. Hadien kane ki nongthew nongwoh ïaka jaka kin pynbiang ïaka report ban pynbiang ïaka mining plan kaba ym ktah iaka mariang ban pan ïaka clearance na ki tnad Environment and Forest.

Ïa kane ka la batai da u Susham Roy (HOD Coal), u Dr. T Chakravorty, Director jong ka United Exploration India, Pvt. Ltd kiba wan ban pynsngewthuh paidbah ïaka rukom dewiong kaba thymmai katkum ki kyndon jong ka Scientific Coal Mining Plan haka jingialang kaba long ha District Library Auditorium, Jowai haka sngi Palei.

Ha kane ka jingpynsngewthuh paidbah la ïadonlang u DMO, Jowai, Marshall Syrti, u Superintendent of Police, West Jaiñtia Hills District Bah Lakdor Syiem, ka Kong DD Syngai MCS, EAC Jowai bad ki nongkhaïi bad ki trai par dewiong.

Kiba bun ki nongkhaii bad ki trai par kila pynpaw ba lada pyntreikam ïa kane ka Scientific Mining Plan bun  ki trai kiba don ki jaka kiba rit haka jingheh kin shah ktah namar bala rem palat ka dor namar ba sha kine ki thain hap ban tih jylliew bha shapoh khyndew bad ka jingrben u dewiong kan don tang hapoh 3-4 phut.

U Nidawmon Shullet, President ka JHTOA, ula ong “Ban pynbiang ïa kane ka mining plan kaba thymmai ki nongkhaii ne trai par kiba don jaka kiba rit haka jingheh kin shem jingeh bha namar ba ka dor tang ban sorjamin iaka jaka kala rem bha.”

“Ngi sngewthuh bha ïa kaei ba kine ki riewshemphang kila batai halor ka mining plan bad ki rukom tih dewiong katkum ka jingstad saian, hynrei kaba eh sha kine ki thain kadei ban tih ïa u dewiong ngin hap ban ngam jylliew bha ban ïoh pynmih ïa u dewiong bad kane khlem pep kan ktah ïaki nongkhaii kiba rit baria bad yn myntoi tang ki malik heh ban ïoh ïaka license ban tih dewiong,” la ong u Nidamon Shullet.

Kiwei kiwei ki nongkhaii kila pynpaw ba kin hap ban pyrkhat bha ha kaba ïadei bad kane ka aiñ tih dewiong thymmai namar tang ban sorjamin iaki jaka kala ktah da ki lak tyngka.