Tang ka jingphohsniew ban pynkylla iaka ri kum Singapore kan ym iarap, dain kuna kaba heh ban pynduh jait iaka plastic: High Court Meghalaya

Syllad | The Rising MeghalayaAugust 17, 2024

Ka Iingkashari High Court ka Meghalaya ha ka 16 tarik ka la bthah ia ka Sorkar Jylla ba kan pynthikna ba kan ym don ka jingpyndonkam beain ia ki plastik bad ban pynlong ka jingkhynra kaba khah khah ia ki dukan bad ban dain da ka kuna kaba heh pyrshah ia kito kiba pyndonkam plastik hapoh ka Jylla.

Nalor kata ka la bthah ruh ia ki bor pyniaid jong ki temple ha ka Jylla ba kin pynthikna ba kan ym don kano kano ka jingpyndonkam ia ki pla plastik hajan bad hapoh ki jaka mane bad ruh ban pyndait da ki CCTV Camera ha baroh ki temple khnang ban khanglad ia kiba rah plastik shapoh ki temple.

Kane ka jingpynmih hukum ka la wan long hadien ka jingbishar ia ka Public Interest Litigation (PIL) No. 7 of 2024 kaba mudui da u Advocate Phuyosa Yobin Vs State of Meghalaya & ors. kaba dawa na ka bynta ban khangdam ia ka jingpynmih, jingbuh bad pyniaid bad ruh ka jingpyndonkam ia ki single use plastic (SUP) bags, ha kaba ka iingbishar ka la bthah ia ka sorkar Meghalaya ba ka dei ban peitngor bha khnang ba ki mar plastik ki dei ban shah bat naduh ki jaka rung.

“Marjan jong ka High Court, ngi lah ban sakhi ba ki don ki song plastik hapoh ki dukan. Dei ban pynlong ia ki jingkhynra kiba man ka por ha baroh ki dukan bad na ka liang ka sorkar Meghalaya ka dei ban pyrkhat ruh na ka bynta ban dain da ka kuna kaba heh pyrshah ia kito kiba pyndonkam plastik hapoh ka Jylla. Ka jingshim ia ki sienjam kiba pyrkhing da ki bor jong ka ain kan iarap ban pynduh jait ia ki plastik na ka imlang sahlang,” ka la ong.

La iathuh ba ka jinglum ia ki jaboh plastik man la u snem la khein ba ka long kumba 5.5 million ton eiei, namar ka daw ba bun na ki nongdie marbam, kiba pyniaid ia ki dukan ha ki rud surok bad ki nongdie jingdie ha surok kim lah ban pyndonkam da ki jait mar kiba kham remdor namar ki mar bym dei plastik ki dei  kiba kham rem dor.

Ka jingpynduh jait ia ki plastik lah ban long tang da kaba pynmih bujli ia ki tiar ne mar bym dei ki plastik kiba lah ban pyntreikam ha ka liang ka ioh ka kot da ka Sorkar bad dei ban pyrshang katba lah ban pyntreikam ia ka buit baroh khnang ban pynlong ia ka Jylla kum ka jaka kaba lait na ki plastik. 

Ka Kashari ka la ong ruh “Lada u nongshong shnong jong ka ri India u leit sha Singapore, un bret ia ki plastic bad kiwei kiwei ki jaboh tang ha ki jaka bret jaboh namar ka jingtieng ïa ka jingshah pynngat, ka jingpynshitom ba tyngeh katba ïa kum kine ki tiar yn bret sha madan madiah shisien ba u juh u briew un wan poi sha India. Tang ka jingphohsniew ban pynkylla ia ka ri kum hapoh Singapore kan ym iarap ei ei, hynrei ka jingpynjari da ki kyndon kiba pyrkhing bad ka jingpynngat ha ka jingdain kuna kaba heh ia ki nongpynkhein ain ki long tang kita ki lad ban pynduh jait ia ki plastick na ka imlang sahlang, kata nalor ka pynphriang ia ka jingtip shaphang ka jingma na ki plastik.