Tang ki Bus kamai bad kali rit ki lah ban iaid lyngba ka jingkieng Umiam

Syllad | The Rising MeghalayaDecember 14, 2023

Ka District Magistrate ka East Khasi Hills, Shillong haka 14 tarik Nohprah 2023, ka la pynjari da ka kyndon Section 144 Cr PC kaba shah tang ia ki bus kamai bad ki kali rit ne Light Motor Vehicle (LMV) ba kin iaid lyngba ka jingkieng Damsite ne Umiam bridge kaba dang don mynta hapdeng ka jingmaramot.

Ka la ong ruh ba kane ka hukum kan treikam noh mardor namar ka jingdawa kyrkieh jong ka kam.

Katkum katei ka hukum la kdew ruh ba ki kali heh ne ki Heavy Motor Vehicle (HMV) bad kiba pdeng ne Medium Motor Vehicle) na kiwei pat ki district kum napoh West Jaintia Hills District bad East Jaintia Hills District kin hap ban iaid lyngba na Mawryngkneng lyngba ka surok Shillong Bypass.

Kumjuh ki kali na ka thain West Khasi Hills, South West Khasi Hills bad Eastern West Khasi Hills District kin hap ban iaid lyngba na Pomlakrai / Mawryngkneng sha Shillong Bypass.

Ka jingmaramot ia ka jingkieng Damsite ka la sdang ha ka 13 tarik une u bnai, ha kaba ia ka jingpyntrei la shimti da ka ITC Cementation India Limited. Kane ka jingmaramot ka la wanrah ruh ka jingdheng kali kaba jur ha kaba bun na ki kali ki la hap ban iaid lyngba ka Shillong Bypass.

Nalor kata kane ka jingmaramot ia kane ka jingkieng da ka ITC ka la wan long ruh hadien ba ka la ap ban ioh ia ka jingbit ban sdang noh ia ka kam mynta lah kumba 4 bnai eiei, kata ban maramot ban kyrshan ban pynskhem ia ka jingkieng Dam kaba la tor bad kut ka por treikam bad kaba buh jingma ia ki paidbah nongleit nongwan.