Tang kiba la dep ai tika COVID-19 kiban ioh ïashimbynta haka Behdieñkhlam

Syllad | The Rising MeghalayaJuly 2, 2021

U President jong ka Seiñraij Jowai u ma OR Shallam haka sngi Thohdieng ula pynbna paidbah ba kin lehkmen ïaka niam Behdieñkhlam, kaba ka jingmut jong ka dei ban beh ïaka sniew ka smeh bad ka khlam haka imlang ka sahlang da kaba bud ryntih ïaki adong adit jong ka jingpang khlam COVID-19 bad yn shah ban iashimbynta tang ia kito kiba la dep ai tika.

Ka jinglehkmen Behdieñkhlam 2021 kan long ryngkat bad ka jingrakhe iaka jingioh laitluid ba 75 snem ka Ri India bad ka jingdap 50 snem ka jingioh jylla ba pura ka Meghalaya. 

Ka Behdieñklam jong ka Seiñraij Jowai mynta ka kynti kan long haka 8 tarik haduh 11 tarik u Naitung 2021 bad ka Seinraij kala dep ban pynkhreh nadong shadong ïaka standard operating procedures (SOP) ban pyrkhing iaki paidbah ban iashimbynta.

“Ngi ai khublei Behdieñkhlam ia baroh bad mynta ka kynti namar ka jingwanlynsher ka khlam COVID-19, ngim lah ban iaidlait iaki kyndon,” la ong u ma OR Shallam haba kren bad ki nongthoh khubor haka jingiadonlang u Dolloi ka Elaka Jowai ma Puramon Kynjing, u General Secretary Seinraij u Arwotki Sumer.

U Ma Shallam, ula iathuh ba kila hap ban pyndam ia baroh ki jinglehkmen paidbah ne ki jingshad paidbah ha une u snem ruh bad ia ki nongiashimbynta yn jied da ki shnong bad tang kiba la dep ban tika kiba ioh ban iashimbynta.

“Ki nongiarap ban shoh bom bad ban put Tangmuri ne ka Bhuri bad kiwei kiwei kiba ki dong ki shnat ki khot iarap lada kim pat ai tika kin hap ban pyndep iaki test bad kidei ban long negative,” la ong shuh shuh u ma Shallam

“Ki briew kiba 60 snem ka rta shaneng bad ki khynnah kiba hapoh 12 snem yn pyrkhing iaka jingiashimbynta jong ki ha kane Behdieñkhlam. Yn ym pdiang iaki nongwan peitkai iaka jinglehniam ne jinglehkmen lait tang kito kiba la jied bad shah khot sngewbha,” la ong u ma Shallam.

Katkum ka SOP jong ka Seinraij Jowai ka ong ba kiba bun hi ki bynta kalong ba kin pyndep iaka jinglehniam ainguh aidem aiki blei ki syiem ban beh iaka sniew ka smeh bad ka khlam.

Shuh shuh ba ki jinglehniam ha Iawmusiang ruh la pynduna briew bad tang hapoh 40 ngut kin don ki nongiashimbynta shi dong.

Baroh ki diengkhlam kiba wanrah ki dong bapher bapher kumjuh ‘Ka Khnong Blai’, ‘Ka Symbood Khnong’ yn shna ha kata ka dur ban rah tang hapoh 20 ngut briew. Bad ka jingsynran iaki diengkhlam ryngkat ki nongshoh bom bad ki nongput bhuri, chew bad kiwei tang hapoh 10 ngut briew.

Ia ki Rot ne ki rong  ruh yn shna ki dong ki shnong kiba lah ban wanrah ha pung kyntang Aitnar tang 10 ngut.

La bthah ia baroh ki nongiashimbynta ban deng iaki mask bad ban saitkhuid iaki kti bad kumjuh ban bud ryntih ia baroh ki adong adit COVID-19.