Tang namar ka kyiad pyniap dusmon ki runar ia u heprit 10 snem rta ha Umtangar, Ri Bhoi

Syllad | The Rising MeghalayaFebruary 24, 2024

Hadien ka jingtohkit kaba bniah ki bor pulit ki la shem ba ka jingshah pyniap dusmon jong u heprit 10 snem rta ha Umtangar, Ri Bhoi District ha ki arngut ki runar  ka dei tang namar ka kyiad, kata hadien ba une u khynnah u la pyrshang ban phet ha ryngkat u bilor kyiad uba dei jong uwei na ki.

Ia kine ki arngut ki runar kiba la tip kyrteng kum u Pynshailang Warjri 32 snem rta uba dei na ka shnong Umtangar kaba hap hapoh Patharkhmah PS, Ri-Bhoi District bad u Banshngai Tynshong 28 snem rta uba dei na Nongthymmai Lapalang, PS Pynursla bad uba shong ba sah mynta ha Umtangar, Ri Bhoi District la ioh ban kem noh da ki pulit ha ka sngi Palei ba la lah hadien ka jingthwet kaba jur.

Na ka liang u SP ka Ri Bhoi District, u Jagpal Singh Dhanoa u la ong ba ha ka jingtohkit la shem ba une u lanot uba la tip kyrteng kum u Kitdorlang Marbaniang 10 snem rta u la thiah hapoh ka sem jong uwei na kine ki runar ha ka janmiet jong ka 17 tarik mynta u bnai.

Ha ka step jong ka 18 tarik, une u lanot u la pyrshang ban phet na kane ka jaka da kaba rah ryngkat ia u bilor kyiad uba dei jong uwei na kine ki runar. Kumta ha ka jingbitar la ong ba u Tynsong ha ryngkat u paralok jong u ki la behthong ia une u heprit bad pyniap dusmon ia u da kaba pyndonkam da ka pla ban set mynsiem

Hadien ba kila leh ia kane ka kam bymman ki la buhrieh ia ka metiap jong une u heprit hajan kawei ka jaka khlaw bad ap tad haduh ban da dum ban pynkynriah ia ka met shapoh ka kper jong u Bah Comand Nongrang.

Mynta ka jingtohkit shuh shuh ia kine ki runar ka dang iai bteng, ong une u heh pulit.

  .