Tehlakam ka Tripura haka jingiakhun pyrshah iaka Meghalaya haka Ranji Trophy

Syllad | The Rising MeghalayaOctober 20, 2024

Ka Tripura ka la lah ba kan tehlakam ia ka sngi kaba ar jong ka jingiakhun ia ka Ranji Trophy Elite Group A pyrshah ia ka Meghalaya kaba la long ha madan ialehkai kriket ka MCA ha JN Stadium, Polo haka 19 tarik u Risaw

Haba wan ban sdang biang na ka 29/2 na ki 7.2 over ba la ioh ban ialehkai haka 18 tarik u Risaw, ka Tripura ka la lah ba kan kamai 346 ron bad hap noh 6 wiket na ki 74.2 over, kaba sa shisien ka jingwan ban kahdum noh ka suin bneng, ka la pynlong ia ki bor pyniaid ba kin hap ban pynsngeh biang noh pat ia ka.

U namtam napdeng ki batsman ka Tripura dei u Sridam Paul uba la lah ban lam khmat ia ka kynhun da kaba u la lah ban kamai 146 ron kaba u la bynrap lang bad ki 20 tylli ki boundaries bad sa ar tylli ki six, hynrei shwa ba un lah ban jam shakhmat ha ka jingbakla u dang thmu ban tied kham jam ia ka bol, kaba pynlong pat ia u ban out hadien ba la kem ia ka da u Aryan Borah ha ki bynta ka mid-off na ka bol ba la kawang da u  Swarajeet Das (1/26 na ki 5 overs).

Hadien kane, u Akash Kumar Choudhary (2/100 na ki 25.2) u la ioh ban pynhap ia wiket jong u kapten ka Tripura u Mandeep Singh uba la lah ban kamai 59 ron ia kaba la kem ia ka (catch) da u Bamanbha Shangpliang ha ki bynta ka off-side hakhmat jong ka square.

Ha kum kane ka por, u Mandeep bad u Sridam ki la lah ban seng nongrim ia ka jingkamai ron paralok kaba 132 ron naka bynta ka wiket kaba saw, kaba long ka synñiang bah ia ka kynhun hi baroh kawei.

Kiwei kiwei pat ki nongkawang bol ka Meghalaya kiba la ioh ban khur ia la ki wiket ki jong ki, ki long u Dippu Sangma (1/76 na ki 19) bad Aryan (1/29 na ki 4).

Shwa ba kane ka jingiakhun yn pynsangeh noh, ki arngut ki batsman ka Tripura kiba dang iai neh ha ka jingiakhun ki long u MB Mura Singh uba la lah ban kamai 53 ron bad u R. Sharath 54 ron.