Thalain ki MDC ïa u Thombor Shiwat ba u kren klumar ba wat ki MDC ruh kin iakhih lada ym ioh tulop ka JHADC

Syllad | The Rising MeghalayaFebruary 28, 2020

Ki MDC jong BJP ha Jaiñtia Hills Autonomous Distirct Council (JHADC) kila thalain ïa u CEM JHADC u ma Thombor Shiwat halor ka jingkren klumar jong u ha ki nongtrei jong ka JHADC kiba wan ïakynduh ïa u ban kyrpad ban pyllait tulop haka 26 tarik une u bnai da kaba ong ba wat ki MDC ruh kin ïakhih lada ym ioh tulop ka konsil.

Ki MDC ka BJP kila ïathuh ba ki nongtrei ka konsil lyngba ka JHADCSA kila ïakynduh ïa u CEM bbad ai ruh ha u ïaka dorkhat ban pyllait ïaka tulop, ka arrear kaba ki dang dei ban ïoh bad kila maham ba la kimi ioh iaka tulop hapoh Lber 2020 kin iakhih bad sangeh treikam.

Hynrei une u khlieh duh ka konsil ha ka jaka ban ai mynsiem ula klumar bad ïalam da kaba ong “Ki MDC ruh kin ïakhih lada ym ioh tulop namar maki ruh kim ïoh tulop”. Ki MDC ka BJP kila kynthoh tyngeh ïa une u khlieh duh ka konsil bad buh jingkylli bad no une u CEM bad ki MDC kin iakhih haba ki MDC ki dei ki nongpyniaid iaka konsil.

Kane ka jingkren u CEM ma Thombor Shiwat ka paw shai ba ym dei satia u briew uba tbit ban ïalam iaka konsil bad kane ka dei tang ka kren kaba pynpaw shaka pyrthei iaka jingbiej jong u, kum u nongïalam, uba ka kamra jong u kum u nongialam ka dei ban tahw ki lad ki lynti bad shna iaki policy treikam ban lah ban pynaiaid shakhmat iaka konsil.

Ka konsil ka don ïaka pisa kaba ka pynmih hi bad ka Reserved Fund haduh ka 28 tarik u Rymphang 2019 ka long 2.70 klur kaba ïoh lum da ki tnad treikam ka konsil. Na ka khajna mar poh khyndew na ka bhah hadpeng ka sorkar bad ka konsil naduh 01 tarik Lber 2019 haduh 15 tarik u Risaw 2019 ka la kot 15 klur tyngka bad naduh ka 01 tarik Lber 2019 haduh ka 31 tarik Naiwieng 2019 ka konsil kala lum T4.22 klur tyngka bad na trading by non–tribal naduh ka 01 tarik Lber 2019 haduh ka 31 tarik Lber 2019 la iohlum ka konsil 0.78 klur tyngka.

U Thombor Shiwat ula kam ruh ba ka konsil ka la ioh pdiang ia ka pisa kum ka bhah jong ka naka State Government naka bynta u mar poh khyndew ka la kot kumba 26 klur tyngka kumta lada khein lang tang haduh kine ki bnai kata naduh ka 28 tarik Rymphang 2019 haduh ka 26 tarik Naiwieng 2019 ka la kot palat iaka 45 klur.

Shuh shuh bad ka bhah ka council kaba ka sorkar jylla kala dep pyllait kala kot haduh 45 klur kumba la pynpaw da u Chief Minister ha ka jingialang ka Cabinet Minister kaba la long ha Jowai ha ka 4 tarik Rymphang 2020 bad lada khein lang iaka jingioh lum pisa ka konsil tang ha kine ki bnai ka la palat ia ka 93 klur tyngka kata naduh ka 28 tarik Rymphang 2019 haduh ka 26 tarik Naiwieng 2019, la kynnoh ki MDC BJP.

Kine ki MDC ka BJP kila pan jingshai na u CEM ba naduh ka 26 tarik Naiwieng 2019 haduh 27 tarik Rymphang 2020 ka council ka la ioh lum haduh katno namar ba mynta la kynjoh 6 bnai ki nongtrei bad dkhot ka konsil kim shym la ïoh tulop.

Ki MDC BJP kila dawa na u CEM ban hiar shuki da lade namar ba um sngewthuh iala ka jong ka bor bad ka iktiar jong ka konsil bad um don ruh iaka policy treikam kaba shai.