Thalain kylla u Balen Thubru ia u Kyrshan Dkhar ba kam president AJCCTA

Syllad | The Rising MeghalayaOctober 23, 2021

U Ma Balen Thubru, president All Jaintia Cement and Clinker Transporters, Association (AJCCTA) ula thalain tyngeh ia u Kyrshan Dkhar, secretary barim ka AJCCTA halor ka jingkam president bad iaid shakhmat ban lum ia ki sengbhalang ban shna iala ka jong ka seng.

U Ma Balen haba kren bad ki nongthoh khubor ha conference hall ka Infinity Restaurant, Ladthadlaboh, Jowai ula ong ba ka jingkam president une u Kyrshan Dkhar ka long kaba ialam bakla ia u paidbah bad ula maham ba lada une u Kyrshan Dkhar u dang iaid shakhmat ban tuklar iaki kam jong ka AJCCTA kin shim da ka rai kaba tyngeh.

“Kumno une u briew uba nga shu thung ban long  secretary bad ngi da siew da ka tulop ia u manla ka bnai u nud ban tuklar iaki kam AJCCTA bad kaei ka nongrim kaba u don da kaba kynthup ia ki sengbhalang kum ka HANM bad ka JYF kiba ym don wat tang kawei ka kali ban iasylla sha ka kam transporter ne ban kit ban bah cement,” la ong u ma Balen bad u la buh jingkylli iaki artylli ki sengbhalang kiba kynthup iaka HANM bad ka JYF ki mut aiu ban iasylla lang haka kam jong ka AJCCTA.

U Ma Balen ula ong ruh ba ia u Kyrshan Dkhar la weng naduh ka 2 tarik kum u secretary bad haka jaka jong u la thung da u Boneyfast Rymbai uba dei uwei na ki para ba leh Transport.

Ula iathuh ba iaka AJCCTA ula thaw hadien bala bun palat ki bar jylla kiba trei ia kane ka kam bad ban lait naka jingshah iuhroit kum ki trai jylla la thaw ia kane ka seng bad mynta ki don haduh 7 ki transporter Khasi Jaintia bad kiba bun hi ki dei ki bar jylla kiba don haduh 70 ngut.

“Ki nongkit nongbah bar jylla kiba siew tulop ia une u Kyrshan Dkhar ban iaid shakhmat ki kam ki jam jong ka AJCCTA haka por ba u dang kit dang bah iaki kam ki seng, hynrei hadien ba kila ioh secretary ngi la beh noh ia u bad lada u dang pyrshang ban kam ialade kum u president ka AJCCTA kan leh da kaba tyngeh,” la ban biang u ma Balen.

U Ma Moon Mulieh uwei na ki transporter barim bha ka thain, ula ong une u Kyrshan ula pyrshang ban ialam bakla iaki paidbah bad iaki para transporter. Ka AJCCTA kam ithuh shuh ia une u Kyrshan Dkhar namar naduh nyngkong ki sngi ruh um dei hi u transporter bad u don tang kawei ka trok kaba iarap pyniaid maki.

U Balen ula dawa ruh na u Kyrshan ba naduh ba mih ka khubor ba u dei ban wan pynphai iaka Registration Certificate ka Ambulance kaba pyniaid ka AJCCTA hapoh lai sngi.

Ha kaba iadei bad ka jingkynnoh ba u Balen Thubru ula shah beh naka AJCCTA, JHTOA, u Balen ula ong ba ula don bynta da ki phew snem ha ka jingshakri ban wanrah jingmyntoi iaka hok ki trai trok ha rilum Jaintia.

“Haka por ba nga dang long kum u nongialam ka JHTOA ruh ngi la leh shibun ki kam ban myntoi ki trai trai muluk bad kila khang pyrshah ruh ban khang iaki trok kiba wan nabar ban kit dewiong bad ban khang ruh iaki bar jylla ban iadie ia thied mawshun sha ki company,” la ong u ma Balen bad ula  bynrap ai ba ki paidbah kin bishar ia kam jong u bad ula pynrem iaka jingkynthoh u Kyrshan Dkhar ba u ma Balen udei uba ieit bar jylla.

“Wat ha kaba iadei bad ka jingsiew jingtda ki company ngi la hap ban iakhun da ka mukotduma bad pynlong iaki jingiakhih strike kaba la pynbor iaki company ban siew iaka pisa ki nongkhaii trai jylla da ki klur,” la ong u Ma Balen bad ong ki kam kiba ngi trei kadei ban myntoi ki transporter Khasi Jaintia bad kane ka kam kadei kaba suk bad u khot u wer ia kiwei ruh ban wan trei ia kane ka kam ban myntoi, khnang ban pynduna iaka jingwan ki bar jylla ban khaii pateng sha kane ka thain.

Ula kren kob ruh ba wat ka JHADC bad ka sorkar mynta ka don ka jingkhein ki transporter bad ka ioh iaka bai trading license bad ki labour bad kiwei kiwei ki khajna da ka jingdon ka AJCCTA kaba la pynduh iaka jingthmu leh khlieh shrieh ki bar jylla haka kit ka bah, kaba mynta kine ki bar jylla ruh ki hap ban iatreilang bad pynbiang ia baroh ki jingdonkam ka sorkar Jylla bad JHADC.