Thang ka JSM ïaka tyngshop U Modi & hato hap pan jingbit na bynta ban ïakhih paidbah?

Syllad | The Rising MeghalayaFebruary 11, 2019

KHLIEHRIAT: Haba don ka mon don ka lynti bad kane ka long shisha mynta ka sngi na bynta ki dkhot jong ka Jaintia Students Movement (JSM), Central Body kiba la shah pynthud ha ki pulit haka sien nyngkong; hynrei ha kaba ar sien ki la pynurlong ïa la ka jingthmu jong ki ban pynpaw ïa ka jingpyrshah ïa ka Citizenship Amendment Bill 2016 da kaba thang ia ka tyngshop jong u Narendra Modi u Prime Minister ka Ri India.

Mynne ka janmiet, ki dkhot jong ka JSM kila ialang hajan u Mot U Woh Kiang Nangbah ha ka Khliehriat bad ki la pyrta pyrshah ïa u Modi bad ïa ka Citizenship Amendment Bill bad hadien kata ki la ia thang ia ka lyngshop jong u Modi.

Hynrei katei ka jingthmu jong ka JSM ka la dei ban dep ha ka por nohphai sngi haba ki ialum para ma ki ha Lad Block, Khliehriat bad ha ka por ba ki dang thmu ban thang noh ia ka tyngshop jong u Modi, kynsan la wan poi noh ki pulit bad ka la mih ka jingiakawang ktien bad ki pulit. Hynrei ki pulit ki la khanglad ïa ki bad ki pulit la iaknieh ia ka tyngshop na ki dkhot jong ka JSM bad ki la phah ïa ki ban ïapra noh.

Katto katne ki riew paidbah kiba sakhi ia katei ka jingjia ki la buh da jingkylli hato ym don hok mo ban iakhih ha ka lynti ka jingjai jai bad hato ym long shu ban pyrshah ia kano kano ka aiñ jong ka sorkar bad hato ban pynlong kino kino ki jingialang pyrshah sorkar katkum ka rukom jong ka synshar paidbah hap ban pan jingbit beit na ka sorkar.

Ka JSM ka pyrshah ia kane ka Citizenship Amendment Bill namar kane ka Bill kan ai bor ia ki briew na Ri Pakistan, Afghanistan bad Bangladesh kiba dei na ki jait niam Hindu, Sikh, Khristan bad kiwei de ban kylla long ki nong India. Kane kan wanrah ia ka jingwan buhai shnong ha jylla Meghalaya bad kiwei ki jylla ha thain shatei da kitei ki briew bad kin sa thyllep ia ki trai shnong.