Thang ka KSU ia ka jubab ka MPSC ban pyrshah ia ka jingleh thurmur ha ka thungkam thungjam

Syllad | The Rising MeghalayaAugust 1, 2024

Ki nongialam bad dkhot ka Khasi Students’ Union (KSU) haka 1 tarik Nailar ki la thang ia ka jubab jong ka Meghalaya Public Service Commission (MPSC) ha ka jingiakhih shong kyllain mungor hakhmat jong kane ka ophis kum ka dak ban pynpaw pyrshah ia ka jingbym lah ban pynbeit ia ki kynrum kynram kiba mih na ka thungkam ia ki MCS, MPS bad Statistical Officers ha ka tnad Animal Husbandry & Veterinary.

Kane ka la wan long ruh hadien 48 kynta jong ka jingai por ia ka MPSC ba kan pyllait paidbah ia ki marks jong ki nongiakhun ia ka eksam jong ka Meghalaya Civil Service (Prelims), ban pynshai ia ka jingduna jong ki kyrtong ba shah jied ha ka Meghalaya Police Service ban leh Personal Interview bad ka jingthungkam ia arngut ki Statistical Officer ha ka jaka uwei katkum ka jingpynbna laitkam ba pynmih ha u snem 2019.

U Chairman ka Employment Monitoring Cell ka KSU, u Reuben Najiar u la ong, “Ngi kyntait mardor ia kane ka jingpynksan jong ka MPSC haba iashim bynta lang bad kiwei ki nongialam bad ki dkhot ka Seng ban ia tar bad thang ia kane ka jubab ba la ai da ka MPSC.

“Hadien ba la bishar ia kane ka jubab, ngi la shem ia ka jingleh thurmur bad bym hok ha kaba iadei bad ka rukom thung kam.Kumta ngin ym ailad ia ka MPSC ba kan shim sting halor kane ka mat da ka jingthmu ban ialam bakla ia u paidbah. Ngin bteng ban pynlong ia ka jingiakhih tad haduh ban da pynurlong ia baroh ki jingdawa,” ong utei u nongialam ka Seng.

Ki nongialam ka KSU ki la iakynduh ruh ia u Chairman ka MPSC hadien ka jingkhot iakren ka jong u ha kaba ka la bteng ban ban jur halor ka rukom thungkam kaba shai bad kaba khuid ba suba.

Haba kren ha ki lad pathai khubor hadien ka jingiakynduh ia u Chairman ka MPSC, u samla Najiar u la ong, “Ngi la dawa ba ka Commission ka dei ban pyllait mardor ia ki marks jong baroh kiba iakhun ia ka eksam MCS (Prelims). Halor kane ka MPSC ka la mynjur ia ka jingdawa ka jong ngi bad kular ban pyllait ia ki marks mynta ka janmiet sngi Palei.”

Ha kaba iadei bad ka eksam MPS, une u nongialam ka KSU u la ong ba ka seng ka buh ka jingkylli halor ka rai jong ka MPSC ban iaid lait na ka jingpynbna laitkam na ka bynta ban bud ia ka ratio kaba 1:2:5 haba khot ia ki nongiakhun (candidate) sha ka personal interview.

“Ka Commission ka la khot tang khyndiat eh ki candidate (kumba 27 ngut) na ka bynta ka personal interview ha ka jaka ba kan ym duna ia ka 42 ne 43 katkum ka ratio kaba 1:2:5,” u la ong. Halor kane u Chairman ka MPSC u la pan por da kaba ong ki donkam ban iamir jingmut ia kane ka kam bad ki nongsaid ain hashwa ba kin iakren biang bad ka Seng. “Hynrei, ngi la ban jur ba ki dei ban bud beit ryntih ia ka jingpynbna bad ba ym iaid lait na kane ka lynti kaba dei,” u la ong.

Katba ha kaba iadei bad ka kam Statistical Officer, ka seng ka la buh jingkylli halor ka rai jong ka Commission ban pynbna ia ka result na ka bynta ki arngut haba ka jingpynbna laitkam ka dei tang na ka bynta kawei ka post, kata ruh kaba dei tang ia ki Khbasi Jaintia category. Halor kane ka MPSC ka la kam ba ka la don ka jingbakla ha katei ka por bad na ka tnat ka la phah ia ka shithi ba don artylli ki post.

Halor kane ki la pyni ruh ha ngi ia ka shithi ia kaba kum ka seng hi ka la pynpaw ba kiba kum kine ki jingleh bakla kim dei shuh ban dang jia hadien habud. “Lada ailad ia kiba kum kine ki jingbakla, kumno ngin ngeit ia phi,” ong u nongialam ka seng.

Lah ban kdew ba ka jingartatien ia ka jingleh hok ka MPSC kala mih hadien ba kala pynmih biang sa ia ka thup ki 62 ngut ki kyrtong, kiba la pynbna ba kila pass ia ka eksam MCS (prelim), ki ban ioh iakhun ia ka eksam main ban long ha u Nailur.

Haba pynpaw halor ka jingdonkam ban pynbeit janai ia ka rukom treikam ka MPSC, une u Nongialam ka KSU ula ong “Lada ka MPSC ka long kumba ka long mynta, kum kine ki jingjia kin nang iai jia beit na ka por sha ka por.

Shuh shuh u la ong ba ka Seng kala rai ba kan sa leit iakynduh ia ka Sorkar Jylla ha kine ki sngi ban wan ban aiti ia ka jingtyrwa ha kaban pynkylla ia ka rukom treikam ka MPSC.

Kane ka jingartatien ia ka jingleh hok ka MPSC ka la wan long hadien ba ka la pynmih biang sa ia ka thup ki 62 ngut ki kyrtong, kiba la pynbna ba kila pass ia ka eksam MCS (prelim), ki ban ioh iakhun ia ka eksam main ban long ha u Nailur u ban wan.