Thang mombati ka JSM halor ka jingshah pyniap bad suba shah lehbeijot ka khynnah skul

Syllad | The Rising MeghalayaJanuary 18, 2021

Ka Jaintia Student’s Movement (JSM) ka la pynlong da ka jingthang mombati ban pynpaw ïaka dak ka jingsngewlem halor ka jingshah pynïap dusmon kawei ka khynnah skul haki riew thrang snam kiba la suba jur ba ki la bat bor shwa ban pynïap ïaka.

Ïa kane ka jingthang mombati la pynlong ha Parking Lot jong ka Sein Raij kaba don ha Ïawmusiang, Jowai mynta ka janmiet jong ka lah sngi U Blei.

Lah ban pynkynmaw ba ka jingshah pynïap kane ka khynnah kaba dang shong haka klass IX ka la jia haka 16 tarik Nohprah 2020 ha kawei ka shnong haka thaiñ East Jaintia Hills.

Kumba ju long man ka sngi, katei ka khynnah ka mih na la ïing haka step 16 tarik ban leit sha skul ban thoh ïaka eksamin khlem da tip satia ba kan long ka sien kaba khatduh ba ki ba haïing jong ka kin iohï ïa ka.

Hadien ba la dep thoh eksamin ka la mih ban leit beit beit sha la ka ïing hynrei kam shym la poi satia sha la ïing haduh ka por janmiet ba ki ba haiing kila wad haryngkat bad ka shnong kila wad paidbah iaka.

Dei haka step 17 tarik ki sa lap ïa ka met ïap jong ka ha lynti paidbah bad ki nongshong shnong kila pynpaw ka jingsngewkhia halor kane jingjia.

Hashwa ban ïashim bynta haka jingthang mombati ka la don ka jingïalang lyngkot ha kaba ki nongïalam jong ka JSM ba kynthup naduh u Joint Secretary u Pillar Phawa,
General Secretary Women Wing ka Kong Nida bad Iba Dkhar bad kiwei kiwei kiba la kyntu ïa ki bor jong ka aiñ ba kidei ban shim khia bad bad kem ïa ki runar kiba donkti ban leh ïa kum katei ka kam kaba ym lah ban pdiang da ka imlang salang bad lada lap la kyntu ïaka aiñ ba ymdei ban pyllait hynrei pynshitom tyngeh ïaki.