Thang mombati ka KSU ban pyrshah iaka jingshah pyniap ka khynnah skul ha East Jaintia Hills

Syllad | The Rising MeghalayaMarch 17, 2021

Ka Khasi Students’ Union (KSU) Wapung Unit ka la pynlong ïa ka jingthang mombati ban pynpaw ka jingpyrshah jur halor ka jingshah pynïap ka khynnah skul ha East Jaintia Hills haka sngi Balang.

Ïaka jingthang mombati la pynlong ha phyllaw ka Wapungskur Higher Secondary School, East Jaintia Hills District haka jingïadonlang ki khynnah skul kumjuh ki dkhot sengbhalang ba kynthup ka MPUF, AJYWO bad JSM.

Hashwa ka jingthang mombati ka la don ka jingïalang lyngkot bad ban sneng ban kraw iaki khynnah. La ïoh ka jingkren na u President KSU Wapung Unit D Lyngdoh, Advisers KSU Wapung Unit DL Rymbai bad na ki nonghikai.

Baroh ki nongkren ki la pynpaw ka jingsngewkhia ba ka District kala jyllei kum kine ki jait kam bad la kyntu ïa ki bor jong ka aiñ ban shimkhia bad kem ïa ki runar kiba donkti ban leh ïa kum kine ki kam poh.

Ka KSU ha kane ka jingïalang ka KSU ka la dawa na ka sorkar ban buh ïaki jaka ai jinghikai ban ïada ialade ne self defense haki skul kumjuh ki kolej khnang ban don ka jingshong shngaiñ ïa ki kynthei khynnah.

Lah ban pynkynmaw ba katei ka khynnah kaba shah pyniap kala jah naduh ka sngi Thohdieng (12/03/21) bad la lap ïaka met ïap jong haka sngi Saitjain (13/03/21) haka jaka kaba la tip kum ka Wah Umbluh Wai Khyrmi, ka jaka kaba hap hapoh u pud u ang jong ka Dkhiah East.