Thang tyngshop ki sengbhalang ha Khliehriat, byrthen ban nang pynjur iaka jingiakhih dawa ILP

Syllad | The Rising MeghalayaDecember 9, 2020

Ka kynhun jong ki sengbhalang kaba kynthup iaka FKJGP, KSU, HNYF, JSU bad kiwei kiwei kila tyngshop bad byrthen ban pynjur iaka jingiakhih ban dawa pyntreikam iaka ILP haka sngi Balang ha Khliehriat.

Hashwa ka jingïalang paidbah kaba long ha u mot u Kiang Nangbah, Khliehriat ka la don ka jingïaid paidbah kaba sdang na madan phutbol jong ka skul Khliehriat HS School bad ïaid lyngba ïaka sor Khliehriat ryngkat ka jingrah ïa ki banner ki placard bad ka jingpyrta ‘No ILP No Rest’, ‘MDA down down, Modi down down’ bad dawa ruh ban pyndam iaka jingtreikam ka CAA ha Jylla.

Haba kren haka jingialang paidbah u Publicity Secretary KSU u Pynshaiborlang Rani ula ong “Ka jingdawa ia ka ILP kam dei ba dang kha thymmai hynrei ka la dei ka jingdawa kaba la shong la mih la kha naduh u snem 1985.”

“Naduh une u snem kane ka juh ka jingdawa ka dang ïai neh sah na kane ka Jylla bad ha kane ka kynti ka sorkar India kadei ban sngap ïa kane ka jingud jingnam jong ki paidbah kane ka Jylla baroh kawei namar ngi khlem dawa ïaka Inner Law Permit ngi dawa iaka Inner Line Permit bad ka sorkar kadei ban sngewthuh iaka hok nongkynti jong ngi,” la ong u Pynshaiborlang

Ula ong haka por ka jingsynshar ki phareng iaka India baroh kawei la pyntreikam ia kata ka inner line permit kaba ngi tip kum ka Bengal Eastern Frontier Regulation Act 1873 bad ka jingthmu jong kane ka ka long ban ai ka jingiada kaba kyrpang na ka bynta ki paid riewlum haka Jylla baroh kawei, hynrei kaba sngew lyngngoh ka long ka sorkar ka dang iai kuman shi kuman bad mynta ka shong ha ka ksangti jong ka jaidbynriew kumno ban rai kumno ban leh nangne sha khmat.

“Ha u 2019 dei lyngba ka jingpynbor jong ki sengbhalang la pynlong iaka sorkar bad iaki MLA ban khot kyrkieh iaka dorbar hynrei mynta ka kynti ruh ka la dei biang ka por ba ngin leit shaw iaki MLA ban pynbuk noh iaki da ka traiñ ba kin leit shapoh nongbah Delhi ban pynlong ka jingiakhih bad ban pynkonguh iaka sorkar MDA ban ai noh iaka ILP hapoh ka Jylla.

Ka sorkar pdeng ka lah ban ai ILP ia ka Jylla Manipur balei kam lah ban ai ia ka Jylla Meghalaya “Imat ba dang khlain ki lehnoh ha Manipur kumta ka Sorkar Kmie ka tieng bad pynsted noh ia ka jingai ILP ha Manipur,” ula ong u Pynshaiborlang bad ula dawa na ka sorkar ban pyntreikam mardor iaka ILP haka jylla ban tehsong bad iada iaka jaidbynriew.

Kiwei kiba la ai jingkren ki long u President Synjuk Ki Waheh Shnong East Jaiñtia Hills District u Bah Satly S. Ryngkhlem, Publicity Secretary JSU Khliehriat Circle Edmund Sumer, u President HNYF Eastern Region Lamsuk Lyngstang ha ka juh ka por uba dei ruh u Waheh Shnong jong ka Narwan, Organising Secretary KSU Jaintia Hills District Unit Lenigard Tariang, President FKJGP East Jaintia Hills District Unit Meral Suting bad ïaka jingialang la pyniaid da u SS. Niangti President KSU Khliehriat Circle.

Baroh ki nongkren ki la pynrem ia ka Sorkar Kmie kaba ym shym la pyntreikam ia ka Inner Line Permit ha ka Jylla Meghalaya bad pynrem ruh ia ka Sorkar Meghalaya Democratic Alliance kiba ym shym la shimkhia ban leit dawa na ka Sorkar Kmie ban dawa pyntreikam Inner Line Permit.

Shuh shuh ki nongkren ki la byrngem ba lada ka Sorkar ka shim por palat ban pyntreikam ia ka Inner Line Permit ha Meghalaya kam pher wat lada kan poi haduh uno uno u pud ruh kin pynkhlaiñ ïaka jingïakhih.

Shuwa ban pynwai ïa ka jingïalang, ki la thang ïa ki dur tyngshop ba thoh NDA bad CAA.

Kane ka jingiaid paidbah ka long kaba iaid beit iaid ryntih bad kam don kano kano ka jingjia bad la sakhi ruh iaka jingpahara jur jong ki pulit ha sor Khliehriat.