Thang tyngshop Modi ka JSU ha Dawki; dawa pyndam CAB & pyntreikam ILP

Syllad | The Rising MeghalayaFebruary 12, 2019

JOWAI: Mynta ka sngi ba Ar, kum ka dak ban pynpaw ka jingpyrshah kaba jur halor ka jingthmu ban pynlong aiñ ïaka Citizenship Amendment Bill (CAB) 2016, ka Jaiñtia Students Union, War Jaiñtia Circle kala thang ïaka tyngshop jong u Myntri Rangbah duh ka Ri, Narendra Modi ha Dawki, ka shnong kaba don ha khappud India Bangladesh.

Kane ka jingthang tyngshop ha Dawki, ka long ban phah khubor sha ki nong Bangladesh ka ri kaba jan tam bad ka Jylla Meghalaya.

U Treiborlang Suchen President ka JSU Shillong Circle bad u President JSU War Circle u Eddy Kery Pohtam kila kyntu ïaki trai muluk ban ieng tylli ban pyrshah ïaka CAB ban lait ka jaidbynriew naka jingshah tyllep ha ki bar jylla.

“Lada ka long aiñ ka CAB daki klur ki nong Bangladesh bad na kiwei kiwei ki ri kin wan rung kyrthep sha kane ka Jylla bad ka thaiñ shatei lam mihngi baroh kawei bad kan ktah ïaka jinglong trai ri jong ngi ki jaidbynriew rit paid”, la ong ki nongialam ka JSU bad bynrap ba ki pyrshah jur ïaka jingthmu ban kdup ïaki bar ri na Bangladesh, Pakistan bad Afghanistan kiba dei na ka niam Hindu, Sikh, Parsis, Bhudhis bad Khristan.

Ha kane ka jingthang tyngshop la thang ryngkat ïaka dur u Modi bad ka jingpynrem jur ia u bad la dawa ban pyndam mardor ïaka CAB. Ha kajuh ka por la dawa naka sorkar jylla ba kan pyntreikam noh ïaka ILP (Inner Line Permit) hapoh ka Jylla da kaba pyrta shla “NO ILP NO REST”.