Thaw history ka North Liberty haka Jubilee Rupa: Ka skul kaba nyngkong ban ioh kyrdan nyngkong haka result SSLC na West Jaintia Hills

Syllad | The Rising MeghalayaApril 5, 2025

Ka North Liberty Higher Secondary School, Jowai kala thaw iaka history haka pule puthi da kaba long ka skul kaba nyngkong eh na West Jaintia Hills District ban ioh ka kyrdan ba nyngkong haka First Twenty ha ka Secondary School Leaving Certificate (SSLC) Examination kaba la pynbna da ka Meghalaya Board of School Education (MBOSE), haka 5 tarik Iaiong.

Ka Avila Kathrene P Lyngdoh, ka samla pule na kane ka skul, ka la ioh ïa ka kyrdan ba nyngkong da kaba ioh 582 mark, kaba la sam lang bad ka Leisha Agarwal of St Margaret’s Higher Secondary School, Shillong,

Kane ka skul ka la ioh sa ar ngut kiwei ki samla pule ba poi ha ki First Twenty– u Rahnam Miki Dkhar u la ioh ïa ka kyrdan kaba 8 da kaba ioh 567-mark bad u Hamelamsuk Hadem u la poi ha ka kyrdan kaba 17 da kab ioh 558 mark.

Ka North Liberty Higher Secondary School, Jowai ka la buh rekod ha ka histori ka pule puthi ka rilum Jaintia ym tang ba ka la ioh ia ka kyrdan ba ha khlieh duh hynrei ka dei ruh haka snem ban kan rakhe iaka jubilee rupa ne dap 25 snem ka jingiaid lynti jong ka ban sam jingnang stad naduh ba la seng ia ka ha u snem 2000.

Ka North Liberty ka la pyni ïa ka jinglah jong ka ban sain dur iaka pule puthi ki khynnah bad kala ioh kheit ruh ia u soh jingjop man la u snem, kaba la wanrah ka jing nang kiew ha ka pule puthi haka district bad jylla kumjuh.

Kiwei pat ki skul kiba rung haka First Twenty na rilum Jaintia ki kynthup iaka KJP Synod Mihngi Higher Secondary School lyngba ka Eulogemene Rilin L Suting naka KJP Synod Mihngi Higher Secondary School, Jowai, ka kala wan haka kyrdan kaba 3 da kaba ioh marks 576 bad St. Mary Mazzarello Girl’s Higher Secondary School lyngba ka Phidalen Malang kaba wan haka kyrdan kaba 8 da kaba ioh marks 567.

Ia ka kyrdan 2nd Position la ioh da u Evanshan Nongrum napoh Sacred Heart Boy’s Higher Secondary School, Shillong bad ka Pori Panday na ka Jawaharlal Nehru Higher Secondary School, Phulbari.

Ka jingdon jong kiba poi sha ka kyrdan Top 20 mynta u snem ka la kiew sha ka 85 ngut haba ia nujor na ka 37 ngut ha u snem ba la dep. Ka long ruh kaba pynkyndit ban sakhi ba kine kiba poi sha kane ka kyrdan ki dei na ki skul kiba don ha ki jaka sor bad ki jaka nongkyndong kumjuh.

Ki khynnah kiba ialeh ia ka Eksam SSLC mynta u snem ki long 63,682 ngut, ha kaba ki don haduh 55,473 ngut kiba la pass. Napdeng kiba pass, ki shynrang ki long 22,726 ngut bad ki kynthei ki long 32,747 ngut. Nalor kata ki la don haduh 18,903 ngut ki la pass thik ha baroh ki 5 tylli ki sobjek, katba 36,570 ngut ki la pass ia baroh 6 tylli ki sobjek.

Ka jingdon jong ki khynnah kiba pass mynta u snem ka la thaw rekod, kata haduh 87.10%, kaba la tam haba ia nujor bad ka 55.80% jong u snem ba la dep. 

“Kane ka jingkiew jong ka jingdon kiba pass mynta u snem lah ban pyniadei bad ka jingaiti lut jong ki khynnah skul, ka jingpynkylla ia ki rukom aijingkylli bad ka jingpynrung ia ka CM IMPACT Guide book,” ong u C P Marak, IFS (Retd) Executive Chairman, Meghalaya Board of School Education, Tura.