Thaw ka JHADC iaka Delimitation Committee ban pynbeit iaki constituency

Syllad | The Rising MeghalayaNovember 30, 2023

Ka Executive Committee ka Jaintia Hills Autonomous District Council (JHADC) ha ka sngi Balang kala thaw ia ka Delimitation Committee ka ban khmih bniah ha kaba iadei bad ka jingpynbeit ia ki jaka puta jong ki constituency ka JHADC bad ruh na ka bynta ban pynlong ia ka jingpynsngew paidbah (public hearing) ha kaba iadei bad kane ka phang.

Ka jingpynbna paidbah ba la pynmih ha ka sngi Balang ka ong; “Ban pyniaid shakhmat halor ka shithi jong ka Tnat District Council Affairs ka Sorkar Meghalaya No. DCA.22/2013/225, dt.20.11.2023, ka Executive Committee ka Jaintia Hills Autonomous District Council, Jowai ka pyntip ba la thaw ia ka Delimitation Committee na ka bynta ban jurip bniah ha kaba iadei bad ka jingpynbeit ia ki jaka jong ki constituency ka Jaintia Hills Autonomous District Council Constituency bad na ka bynta ban pynlong ia ka public hearing ha kaba iadei bad kane ka phang.”

Ki dkhot jong ka Committee ki kynthup ia  u Dr. Dakyntuhimi Lyngdoh, Asst. Professor kum u Chairman, Luckystar Ymbon, Advocate kum u Member Secretary. Kiwei pat ki dkhot ka committee ki dei u Markos Surong, Advocate, Kerlang Ksoo, Advocate bad Pyrkhat Shylla, Waheh Shnong Mookyrdup.

Ka Committee kan sa phah ia ka kaiphot jong ka sha ka Executive Committee hapoh jong ka shi bnai.