Thaw ka Sorkar da ka Rationalisation Committee ban bishar ia ka jingdawa pynkiew tulop ki nongtrei SSA ka Jylla

Syllad | The Rising MeghalayaAugust 2, 2024

Ka Sorkar Jylla ka la thaw ia ka Rationalisation Committee na ka bynta ban bishar bniah ha kaba iadei bad ka jingdawa pynkiew tulop ia baroh ki nongtrei ka Samagra Shiksha (Non-Academic) ha ka Jylla, kata watla kine ki dkhot kiba pynlong jingiakhih ki la rai ban bteng ia kane ka jingiakhih tad haduh ba ka jingdawa pynkiew tulop ba 80% kan urlong.

Ka jingpynbna halor ka jingthung ia ki 20 ngut ki dkhot jong ka committee ia kaba yn khlieh da u Commissioner & Secretary u Vijay Kumar Mantri ruh la aiti da u Myntri Rangbah ka Jylla u Conrad K Sangma sha ka kynhun ki nongmihkhmat jong ka All Meghalaya SSA Non Teaching Staffs Association (AMSSANTSA) ha ka jingialang kaba la long hapoh ka ophis treikam jong u ha Secretariat haka 1 tarik Nailar.

Haduh kumba 1200 ngut ki nongtrei (non teaching staff) hapoh ka SSA ki la pynlong ia ka jingiakhih shong kyllain mungor ha madan Malki hadien ba ki la kyntait ia ka rai jong ka sorkar ban pynkitew ia ka tulop jong ki da 25%.Na ka liang kine ki nongtrei ki la ieng skhem bein halor ka nongrim ban dawa pynkiew da 80% nalor ka 2% katkum ka jingshakri slem ha ka kam bad 5% ka jingpynkiew kaba man la u snem.

Katkum ka jingpynshai halor ki 7 tylli ki kyndon treikam jong ka Committee, ka jingpynbna paidbah ba la pynmih da ka tnad pule puthi ka la ong ba ka committee kan bishar bniah ia baroh ki jingdawa kiba ka la ioh pdiang haduh mynta kiba iadei bad ka jingpynkiew tulop ia baroh ki nongtrei SSA.

La ong ruh ba ka committee kan pule bniah ia ka rukom siew jong kiwei pat haka imlang ka sahlang ha ka jylla Meghalaya bad kan kdew ruh ia ki rukom siew ba la bud ha kiwei pat ki jaka pule kiba kum kine, kata nalor ba ka committee kan pule bad aijingmut ia ki sienjam ban pynduh ia baroh ki jingbym iahap ha ka rukom siew ha ki kyrdan ha kylleng ki District bad ki block.

Nalor kata ka committee kan bishar bniah ruh ia ki jingtyrwa ba la ioh pdiang ha kaba iadei bad ka jingpynkiew kaba man la u snem ia kiba kum kine ki nongtrei. Nalor kata kan pyrkhat ruh halor ka jingshakri kaba la slem ban pynbeit ia ka tulop. Ka committee kan aijingmut ruh ha kaba iadei bad ka jingpynbeit ryntih ia ki kam ha ki kyrdan bapher bapher. Kumjuh kan pynthikna ba ki jingbthah bad ki kyndon ba la pynmih da ka tnad Finance na ka por sha ka por dei ban bud ryntih haba ai jingmut,” ong ka jingpynbna.

Haba pdiang sngewbha ia ka rai jong ka sorkar, ka President ka AMSSANTSA ka Kong Jennyfer J Synrem kala ong, “Ngi don ka jingshaniah bad ka jingngeit ha u Myntri Rangbah jong ngi uba dei u nongialam uba shemphang ba un leh ia kane. Ka sorkar kam shim ia ka por namar balei ngin kyntait ia kiwei pat ban kynthup lang haba ngi ioh ia ka lad ban pynthikna ia k jingsiew kaba mar kumjuh na ka bynta ka jingtrei kaba mar katjuh ia baroh.”

“Watla katta, ngin ym pat pynsangeh ia kane ka jingiakhih kaba khlem buh por jong ngi tad haduh ba ki jingdawa kin urlong khnang ba ngin ym donkam ban wan tied ia ka jingkhang jong ka sorkar man la ka por,” ka la bynrap.

Ka president ka long ruh ba u CM u don ia ka jingthmu ban pynurlong ia kane ka jingdawa pynkiew tulop kaba la slem bha, kata kaba khatduh eh ia kaba la leh naduh u snem 2016.

Shuh shuh katkum ka jingpynpaw jong ka, ka Seng ka shaniah pura ha ka sorkar namar kane kan dei ka sien kaba nyngkong ba kan pynbeit ryntih ia ka rukom treikam.  

Haba kylli ia ka daw ba kim shym la dawa ban pynkiew tulop ha kine ki phra snem kiba la leit noh, ka Kong Synrem ka la ong, “Haba phi trei shitom bha bad phim don por na ka bynta ka iing ka sem jong phi, kumta ruh ngim don por ban pynlong ia ki jingiakhih, ngim sngewtynnad ban pynlong ia ki jingiakhih namar ngi don shibun kiei kiei kiba dei ban leh, shibun ki kam kiba la kynton, ngi hap ban ithuh ia ki skul, ngi dei ban ai ia ki jingiarap, ngi trei na ka bynta ki 9 lak ngut ki khynnah skul.”

Nalor kata ka pyntip ruh ba haka 2 tarik Naliar, ka sngi Thohdieng, ka committee kan sa shong ia ka jingialng kaba nyngkong ban iamir jingmut ha kaba iadei bad kane ka kam.