Thaw ka sorkar daka Committee halor ka Roster System pynsangeh iaki jingthungkam

Syllad | The Rising MeghalayaMay 19, 2023

Ka Sorkar Meghalaya haka sngi Thohdieng kala rai ban thaw da ka Committee halor ka Roster System bad la pynbna ruh bala pynsangeh shuwa ia baroh ki jingthungkam thymmai tad haduh bala lah ban pynbeit iaka Roster ne ka jingpynbeit ryntih iaka jingthung thungjam.

Ka sorkar kala shim ia kane ka rai hadien ka jingialang All Party Meeting kaba pyniaid da u Myntri Rangbah Conrad K Sangma kaba long ha Secretariat. Ha kane ka jingialang la wan iashimbynta da ki nongialam jong baroh ki seng sain pyrthei kiba don haka liang synshar bad liang pyrshah.

Kaba lyngngoh ha kane ka jingialang ki na ka kynhun ka Liang Pyrshah, ka Voice of the People Party (VPP) bad ka seng Khun Hynniewtrep National Awakening Movement (KHNAM) kila mih na ka jingialang hadien ba ka sorkar kala phiel ban iakren ne khmih biang iaka State Reservation Policy.

Haba kren hadien ba la wai ka jingialang, u myntri rangbah ka jylla u Conrad K Sangma u la ong ba ka sorkar kala thaw ia kane ka commitee hadien ba ki seng sain pyrthei kila ai jingmut khnang ban lum jingtip kaba bniah, ban ai ka jingshai bad ba kin lah ban ai jingmut ia kiei kiei kiba dang sah ha ka jingartatieng halor ka Roster system.

Ia kane ka committee yn khlieh da ka kong Ampareen Lyngdoh, myntri ka koit ka khiah, la ong u Myntri Rangbah. Ia ki kyndon treikam ka committee yn sa pynmih mardor bad shen ka committee ruh kan shong iaka jingialang.

U Myntri Rangbah ula pynbna ba ka sorkar Jylla kala mynjur iaka jingkyrpad ki seng sain pyrthei bad pynsangeh shuwa iaka jingthungkam thymmai haduh ba ka committee kan aiti iaka report halor ka Roster System.

U la pynshai ba ka roster ka dei tang ia ka kam thungkam thungkam bad kumta, kam dei satia kaba mut pyntreikam ha ka kam pule dangle ban ai bhah pule ha ki jaka pule bapher bapher kiba don ha kylleng ka ri.

Haba kylli, u Conrad ula ong ba ka sorkar kam don jingthmu ban pyntreikam iaka roster system naduh 1972 bad ia kane la dep ban batai pynshai sha baroh ki nongialam sain pyrthei.

Ula ong ba “Ngi la batai ia baroh ba ka roster system ka dei ka kam ba hap iai bteng. Kala sdang naduh u snem 1972 bad kan dang iai bteng. Ka long kaba donkam ia ngi ban sngewthuh ba ka snem ba sdang namar ka ailad ia ngi ban sngewthuh hangno ngi don ha ka roster mynta”.

“Nga kwah ban pynshai mynta ka sngi ba baroh ki jingthungkam kiba la leh ha ki snem bala leit noh bad baroh ki rai bala shim, ki dei kiba la shim kat kum ka Reservation Policy bad kumta, ki dei kiba ka Sorkar ka hap ban bud. Kumta, ka jingkylli ban phai dien bad ban khmih biang ia ka lane pynduh pyndam lane pynbeit hangne hangtai kam mih satia. Kine ki jingthungkam baroh ki dei kiba la leh kat kum ka State Reservation Policy,” la ong u Conrad.

Ha kajuh ka por, ula maham ba kam long kaba dei ban thaw jingkulmar kaban wanrah pynban ia ka jingthut bad ka jingsngewiapher hapdeng ki jaitbynriew ha ka jylla.

Haba jubab halor ka jingpynlong ka Voice of the People Party ia ka jingiakhih ban dawa pynkylla ia ka Reservation Policy, u Conrad u la ong ba kum ki nongialam ba don ka jingkitkhlieh, kam long kaba dei ban thaw ia kano kano ka jingsngew kaba wanrah ia ka jingsngew iapher jaitbynriew bad kaba pynthut ia ka shongsuk shongsain ha ka jylla, bad u la ong ba kam dei ban pynlong politik.

 “Ngi dei ki nongialam kiba don ka jingkitkhlieh, bad kam long kaba bha ban wanrah ia kano kano kaba lah ban pynthut ia ka jingialong kawei, bad ka shongsuk shongsain”, la ong u Conrad.