Thaw rekod ka AMKA palat 500 ngut ki khynnah shimbynta haka Inter School & College Karate

Syllad | The Rising MeghalayaAugust 17, 2023

Ka All Meghalaya Karate Do Association (AMKA) kaba dei kawei na ki shlem aijinghikai ha ka jingialehkai karate ba la rim tam ha ka jylla, mynta ka sngi Palei ka la thaw syndon ia ka rekod halor ka jingdon jong bun tam ki nongiashim bynta ha ka lympung ialehkai ba ka synjuk ka juh pynlong man u snem.

Ka AMKA mynta ka kynti ka la bteng ia la ka sien jam ban pynlong ia ka “29th Inter School and 11th Inter College Karate Tournament 2023,” ba la pynlong ha Multi Purpose Indoor Stadium, jong ka Sports Authority of India STC kaba don hapoh ka jaka pule jong ka skulbah NEHU. Mynta ka kynti tang ki skul kiba la poi ban wan iashim bynta ki long haduh 80 tylli bad 7 tylli ki College, kaba long da kumba lai spah haba ia nujor bad ka jingwan iashim bynta ha ka snem ba la dep.

Ha kane ka sngi plie la ia don lang ruh u Bah Shakliar Warjri, Myntri ka tnat Sports & Youth Affairs kum u Kongsan bad u working president ka Meghalaya State Olympic Association u Bah John F Kharshiing, bad la sakhi ruh ia ki paidbah nongwan peitkai kaba kiba dei ki kmie ki kpa jong ki khynnah bad ki nonghikai jong ki skul bad kolej.

Kum ban shu kdew ha u snem ba la dep ka skul ba la ioh ban rah ia ka nam kum ka lahduh dei ka OM Roy memorial Secondary School ha ka liang ki kynthei bad ha ka liang ki shynrang lahduh dei ka St Anthony’s LP School bad ha ka liang ki kolej ka Shillong College kala ioh ban rah ia ka nam lahduh.

Ka jingthmu jong ka AMKSA ha kasba pynlong ia kane ka lympung kaba lai sngi man la u snem ka long ban plielad plielynti ia ki rang bad thei ialehkai karate kiba dang rit  ka jylla ba kin mih madan ban pynpaw ia la ka jong ka sap kaba ki don, kata la ka jong ha ka Kumite ne Kata.

Shuh shuh dei lyngba kane ka lympung ialehkai ba ka AMKA ka ju ioh ban sei ia ki sap ba nylla bad bteng ban btin lynti pat ia ki ban saindur  janai shuh shuh ia ka jingim ka jong ki tad haduh ba kin da kynjoh ia ka thong ban long ki nongialehkai kaba kynsai bad ban mihkhmat ia ka jylla ha kiba bun bah ki lympung ialehkai lada dei kiba long ha ka ri ne shabar kumjuh.