Thaw rekod u Kishan Lyngdoh haka T20 Cricket ka EJDCA

Syllad | The Rising MeghalayaApril 5, 2021

U Kishan Lyngdoh ula thaw record haka lympung ialehkai cricket T20 Cricket Tournament ka East Jaintia District Cricket Association (EJDCA) kaba la kynjoh sha ka kyrdan jong ka semifinal ha madan Mookhep, East Jaintia Hills District.

U Kishan marwei ula kamai haduh 150 run iaka Sohkymphor haka jingiakhun semifinal pyrshah iaka Tuber haka sngi Nyngkong. Une u samla ula kyrwit 21 fours bad 8 sixes bad ula khyllem shuwa ban kut ka 20 overs. Kane ka jingkamai u Kishan 150 run kadei kaba nyngkong eh haka history ialehkai Cricket ka EJDCA.

U Kishan ula kylla long u namtam ha kane ka jingiakhun bad ula khur iaka khusnam Man of the Match.

Haba phai sha ka jingïakhun ka Tuber ka la jop ïaka jingkynti pisa (Toss) bad ka ailad ïaka Sohkymphor ban tied.

Ka Sohkymphor haba tied ka la kamai haduh 253 na ki 20 Over bad hap 4 Wicket. Haba beh ïaka thong ka Tuber ka lah ban kamai tang 134 na ki 20 Over bad hap noh 8 Wicket.

Ki rangïalehkai jong ka Sohkymphor kiba la ïoh ban pynhap wicket ki long u Kishan Lyngdoh 1 wicket, Ribiang Suchiang 1 wicket, Ram Chyrmang 2 wicket, Babu Singh 2 wicket bad u Ïalammiki 1 wicket.

Katba ki rangïalehkai jong ka Tuber kiba la ïoh ban pynhap wicket ki long u Dayo Lhuid 1 Wicket bad u Denis Lyngdoh 1 Wicket.

Ïa kane ka lympung la sdang naduh ka 27 tarik Lber haka jingwan ïashim ki 8 tylli ki kynhun ïalehkai kriket ka District.