Thaw thymmai ka KHADC ia ka Select Committee ban bishar ia ka Bill ai pateng nongkynti

Syllad | The Rising MeghalayaMarch 29, 2025

Ka Khasi Hills Autonomous District Council (KHADC) ha ka 28 tarik Lber ka la thaw thymmai ia ka Select Committee ban bishar bniah ha kaba iadei bad ka Bill ai pateng ia ki nongkynti ba la tip kum ka Khasi Hills Autonomous District (Khasi Inheritance of Property) Bill, 2021.

Ia kane ka Select Committee yn khlieh da u Chief Executive Member (CEM) u Bah Shemborlang Rynjah kum u Chairman bad u Secretary ka Legislative Wing kum u Member Secretary.

Kiwei pat ki dkhot jong ka Committee ki kynthup ia ka Kong Deity Majaw, Bah Denzil R Chen bad ka Kong Grace Mary Kharpuri.

Hashwa kane, haba wanrah ia ka kaiphod halor kane ka phang, u Bah Shemborlang u la ong ba ia ka Khasi Hills Autonomous District (Khasi Inheritance of Property) Bill, 2021 la phah sha ka Select Committee ba kan bishar bniah bad aijingmynjur ia ka KHAD (Khasi Inheritance of Property) Bill, 2021 ia kaba la thaw ha ka 3 tarik Naitung 2023 hapoh ka jingkhmih jong u Bah Pyniaid Sing Syiem CEM barim kum u Chairman nalor kiwei pat ki dkhot.

Hynrei, ka samoi jong ka Select Committee ka la kut noh khlem da aiti ia ka kaiphod bad kumta ka Executive Committee ka la ai jingmut ia ka iing ban thung ia ki dkhot kiba thymmai jong ka Select Committee.

Kumta, ia kane ka kam la wanrah hapoh ka iing na ka bynta ban ioh ia ka jingmynjur, u la bynrap.