Theh jingiarap ka Wildlife ïaki skul & ka Raij Chyrmang ba pynneh pynsah iaka Law Kyntang

Syllad | The Rising MeghalayaJanuary 8, 2020

CHYRMANG: Ka Jaiñtia Hills Wildlife Division, Jowai kala noh synñiang da ki ben ki miej, ki blackboard bad ki shuki sha ki lai tylli ki skul kiba don haka shnong Chyrmang, ka shnong kaba la pynneh pynsah ïaka Law Kyntang ka Raij Chyrmang bad kaba la ithuh mynta kum ka Community Reserve.

Kane ka shnong ka jngai kumba 8 KM na sor Jowai bad lah ban iaid lyngba ka Syntu Ksiar, ka bynta jong ka Wah Myntdu lane na ka surok Dawki Amlarem Jowai lyngba ka shnong Mustem.

Hapoh kane ka law kyntang ki don ki skei bad ki sim ki doh ba bun jait kiba la ïoh jingïada nalor ki dieng bad ki syntiew ki skud ba bunjait bad kiba pawnam bad iada kyrpang.

Ïa kine ki tiar ka tnad WildLife Division kala aiti hapoh ka jingïalam ka Divisional Forest Officer (DFO), Jaiñtia Hills Wildlife Division, Jowai ka Kong Heisa Lato bad u Range Forest Officer, Umkiang Wildlife Range Ma S Law kila aiti haka 3 tarik une u bnai haka jingïadonlang u Chairman Seiñraij Kongwasan Chyrmang Community Reserve u Ma K Lakiang, Waheh Shnong Chyrmang Ma S Dkhar bad ki nonghikai kitei ki skli ba kynthup ïaka Kong J Khyriem, nonghikai jong ka skul Chyrmang Nein Lower Primary School bad u Ma J Dkhar, Headmaster, Chyrmang Upper Primary School.

Ïa kine ki tiar ka Wildlife kala ïoh ban ïarap lyngba ka Integrated Development for wildlife Habitat bad ka CSS scheme for community Reserves.

Ka DFO Wildlife  Kong H Lato kala ong “Kine ki tiar kiba la synñiang ka tnad Wildlife ka dei kum ka dak ban ïarap mar kylliang ïaka Sein Raij Kongwasan Chyrmang kaba shimkhia ban pynneh pynsah ïa ka Khlaw Kyntang jong ka Raij kaba la ithuh mynta kum ka Community Reserve.”

Ka Kong Lato kala ong shuh shuh ba kane ka jingshimkhia ka Raij Kongwasan ban pynneh pynsah ïaki jingthaw ba im baroh hapoh katei ka khlaw kadei ka jingkyrkhu kaba khraw ïaka shnong Chyrmang namar ba kane kan sa wanrah jingmyntoi ïaka shnong da ka jingwan ki riewshemphang ban pule bniah ïaki mrad ki mreng, ki syntiew ki skud kiba don ha kane ka law kyntang.

“Kane ka shnong ka pawnmaw bha ha ka jingdon ki skei kiba la tip kum ki ‘Barking Deer’ bad ki syntiew orchid uba mih kyrpang tang ha kane ka khlaw kiba ba la tip kum u ‘Bulbophyllum Chyrmangensis’ nalor kiwei kiwei,” ong ka kong Lato bad bynrap ba kane ka jindon kine ki mrad bad ki syntiew ki skud ba kyrpang kan khring ïaki nongwan kai bad ki nongwad bniah iaki jingthung jingtep bad ki mrad ki mreng kaban wanrah myntoi ïaka shnong ka thaw bad ban jur ïaki nongshnong shnong ban ïatreilang bad ka tnad ban pynneh pynsah ïaka law kyntang.

U Ma K Lakiang, Chairman jong ka Sein Raij Kongwasan Chyrmang Community Reserve u la ïathuh ba kine ki jingïarap baroh ki wan dei lyngba ka jingiada ïaka Khloo Blai Chyrmang kaba la ïoh jingithuh kum ka Community Reserve. Shibun ki lad jingïarap kila ioh bad ka mynta ka ïing dorbar ka Raij Kongwasan ruh ka jingtrei kala ïaid shait shait.

Ula kyntu ïa ki nongshong shnong ba kin husiar ban peit ia ka jingwan ki briew ki ba na bar shnong kiba don jingthmu ban wan siat ïa ki mrad ki ba don ha ki khlaw jong ka shnong bad ruh ban shim ka jingkitkhlieh ban pyntip mar mar sha ki bor shnong lane ka ophis ba dei peit. U kyrmen ruh ba ka ophis kan nang theh shibun ki kam pynroi hapoh shnong kiban pynmyntoi ia ki nongshong shnong bad iaka shnong hi baroh kawei.

Kiwei kiwei kiba kren ki kynthup ïa u U J Dkhar, Headmaster, Chyrmang Upper Primary School, S Dkhar, Waheh Shnong jong ka Chyrmang Nein, u ma S Law Range Forest Officer, Umkiang Wildlife haka jingialang kaba pyniaid da ka Kong J Khyriem, nonghikai jong ka skul Chyrmang Nein Lower Primary School haka jingiadonlang ki nongshong shnong bad ki khynnah skul kiba la ai jingrwai bad shad tynrai.