Theh umpjah ka rai sospon ka FIFA iaka AIFF

Syllad | The Rising MeghalayaAugust 18, 2022

U Bah Eugeneson Lyngdoh, MLA Mawphlang Constituency ba dei artad u President ka Shillong Sports Association (SSA), u ong  ba ka rai a ka FIFA ban sospon noh shwa shipor ia ka All India Football Federation, ka long kumba theh umpjah ia kane ka jingialehkai hangne ha ka ri hi baroh kawei.

Haba iakren bad u nongthoh  khubor, u bah Eugeneson u ong ba ha ki snem kiba la leit noh haba leit ban ialehkai shabar, u shem bad iohi ba bunsien dei ka Cricket kaba khring bha ia ki khynnah, pynban dei tad ha kine ki khyndiat snem kiba la leit noh, ba ka Phutbol ruh ka la sdang ba kan khring ia kiba bun ki khun samla, ha kaba ka jingpeit bad ap khmih lynti ka jong ki na kane ka jingialehkai ka dei kaba jur bha, ym tang na ka bynta ka I. League, ka Indian Super League ne wat ia ki lympung ialehkai ba long ha man la ki jylla ruh kumjuh.

Pynban da kane ka rai ban sospon noh ka Fifa namar katta ka jingwan ban mushlia noh da ki bor sorkar, ka long kum ka jingduh mynsiem ia ki briew kiba kum ki jong u Bah Eugeneson lymda don ka lynti kaba biang. U la ong ruh ba lada kane ka rai sospon kan iaineh, ka lawei ka jong ki khynnah ruh kan sah ha ka umdum.

Pynban u Bah Eugeneson u kyrmen ba kiei kiei kiba bha kin sa wan ban mih paw biang nakabynta kaba bha tam naka bynta ka Phutbol hapoh ka ri India hi baroh kawei.

Halor ka khubor ka jingjied noh pat ka jong u da ka Meghalaya Football Association ban leit ban mihkhmat sha ka jingialang jied pynthymmai ia ki nongkitkam ha ka AIFF, u Bah Eugeneson u ong ba kane baroh ka long kat kum katta ka kyndon ne ka ain kumba la pruid dak ia ka a ka Fifa bad ba la pyntrei kam pat ruh ia ka da ka AIFF.

Dei hangne ba u bah Eugeneson u iathuh ba na ka liang u President ba mynta jong ka MFA u la iakren bad u bad  kyntu ia u  ba ha kane ka kynti  ba  un leit ban mihkhmat sha ka jingjied ia ki nongkit kam ka AIFF ha kaba un shim ia ka kamram kum u nongmih khmat bad kumjuh kum u dkhot ka electoral college sha kane ka jingjied ia ki nongkit kam  ba thymmai jong ka AIFF.