Thep ïaka vote da ka jingkitkhlieh ban saiñdur ïaka Ri

Syllad | The Rising MeghalayaFebruary 14, 2019

JOWAI: Shi bynta ka jingpynkhreh ïaka jingjied nongmihkhmat MDC bad MP; ka West Jaiñtia Hills District Executive Force ha ryngkat ka jingïatreilang bad ka ophis u Deputy Commissioner (Election), West Jaiñtia Hills District kila pynlong da ka jingniah thuk paidbah na sor Jowai sha Amlarem ban pynsaphriang ïaka khubor halor jingkordor ka ‘Vote’, ka hok jong u/ka bala dap 18 snem shaneng.

Ïa kane ka jingniah thuk thuk kaba don lang ryngkat bad ka kynhun niah thuk thuk Royal Enfield Riders jong ka Meghalaya Police la pynlong ha ka sngi Palei. Kane ka rally niah thuk kaba tip kum ka ‘Love to Ride, Love to Vote’ kaba phang pdeng ka dei “Free, Fair and Peaceful Conduction of Election”.

La sdang ïa kane ka jingniah thuk na ophis u Deputy Commissioner, Jowai naduh ka por 8 baje mynstep bad la kaweh ïaka lama da ka Additional Deputy Commissioner, kaba long ruh ka RO District Council Election ka Kong RS Manner.

Haba la poi ha Amlarem ka la don ka jingïalang kaba lyngkot ban pynsngewthuh ïa u paidbah halor ka jingkordor ka kawei pa kawei ka vote jong u nongshong shnong.

U Superintendent of Police West Jaiñtia Hills District u Bah Lakador Syiem, ka Kong JU Kharpuri, In-charge Sub-Divisional Officer (C) Amlarem Sub Division bad kiwei kiwei kila ai jingkren ban pynsngewthuh ïa u paidbah halor ka jingkordor ka vote ban jied ïaki nongmihkhmat.

“Kawei pa kawei ka vote kalong kaba kordor; kum ki nongthep vote phi dei ban puson bad pyrkhat janai bha shuwa ban jied ïa u nongmihkhmat khnang ba kan wanrah jingmyntoi ïaka Ri bad ka Jaidbynriew.” la ong U Bah Lakador.

“Ki nongshong shnong kiba la ïoh ïaka hok thep vote, pyndonkam hok ïaka vote da ka mynsiem ba don ka jingsngewthuh bad ka jingkitkhlieh ban saiñdur ïala ka Ri”.