Thep kyrteng 3 ngut ki kyrtong sha ka elekshon MDC ha ka sngi kaba nyngkong

Syllad | The Rising MeghalayaJanuary 27, 2025

Ki la don baroh laingut ki kyrtong kiba la pyndep ia ka jingleit thep kyrteng ha ka sngi kaba nyngkong na ka bynta ka elekshon MDC ha Rilum Khasi bad Jaintia ka ban long ha ka 21 tarik u Rymphang.

Baroh kine ki laingut ki kyrtong kiba la thep kyrteng ha ka 27 tarik Kyllalyngkot ki dei na ki constituency kiba hapoh Khasi Hills Autonomous District Council (KHADC).

Kine ki kynthup ia u MDC ba mynta jong ka Seng National People’s Party (NPP) na Laitumkhrah-Malki constituency u Bah Fantin Joseph Lakadong bad arngut ki kyrtong shimet u Dr OS Jyrwa na Sohryngkham constituency bad u Bah Daniel Wahlang na Mawsynram constituency.

Katkum ki tyllong khubor heh sorkar ym pat shym la don satia kino kino ki kyrtong na kiwei pat ki sawtylli ki District, kata na  West Khasi Hills, South West Khasi Hills, Eastern West Khasi Hills bad Ri Bhoi – kiba hap hapoh ka KHADC bad artylli ki District, kata na West Jaintia Hills bad East Jaintia Hills kiba hapoh JHADC ki ban wan thep kyrteng ha kane ka sngi kaba nyngkong.

Katkum ka jingpynbna kine ki artylli ki ADC ki don baroh 13,08,818 ngut ki nongthep vote bad na kine 9,96,518 ( 515247 ngut ki dei ki kynthei bad 481268 ngut ki shynrang bad laingut ki third gender kiba dei na ka KHADC bad 3,12,300 ngut ki nongthep vote (1611220 ki kynthei bad 151079 ki shynrang bad iwei third gender) ki dei na JHADC.

Baroh ki don haduh 2146 tylli ki polling station ha kaba 1669 tylli ki dei kiba hap hapoh ka KHADC bad 477 ha JHADC.

Ka jingthep kyrteng na ka bynta ki kyrtong ka long naduh ka 27 tarik Kyllalyngkot haduh ka 3 tarik u Rymphang ha ka por 3 baje janmiet bad hadien kane yn bud da ka jingbishar ia ki kyrteng. Ka tarik ba khatduh ban weng kyrteng kan long ha ka 4 tarik Rymphang bad ka sngi ba khatduh ban rai ia ki kot ki sla jong ki kyrtong bad ka jingaiti ia ki shap ne symbol kan long ha ka 6 tarik Rymphang.

Katba ka sngi ban pynlong ia ka jingiathep vote kan long ha ka 21 tarik u Rymphang bad ka jingniew ia ki vote kan long ha ka 24 tarik u Rymphang.