Thep kyrteng 4 ngut ki kyrtong UDP sha ka elekshon MDC JHADC

Syllad | The Rising MeghalayaJanuary 30, 2025

Saw ngut ki kyrtong ka United Democratic Party (UDP) haka 30 tarik Kyllalyngkot kila thep na ka bynta ban iakhun iaka election MDC sha ka Jaintia Hills Autonomous District Council (JHADC) ka ban long haka 21 tarik Rymphang.

Kine ki Saw ngut ki kyrtong ka UDP ki kynthup ia u MDC barim Ma Rioo Sten na Barato Mukroh, u Waheh shnong ka Namdong B bad nongialam barim ka FKJGP Ma Damian War na 10-Mynsngat Khanduli Constituency, u Fernando Sumer na 13-Saphai Sahsniang Constituency, bad Rimilanki Synnah na 7-Nartiang Wahiajer Constituency.

Haba kren shaki ki lad pathai khubor halor ka jingpynkhreh iaka election, u Damian War, ula ong ba ula pynkhreh bha bad pynpaw ruh ka jingsngew skhem ban ioh iaka jingjop. Ka thong ba hakhmat eh jong u kalong ba lada wan haka jingjop, un thaw ki lad ki lynti ban pynsuk iaki paidbah khamtam haka thain khappud ha kaba iadei bad ki kot ki sla kynthup naduh ki kot pata, ki land holding namar kumba long mynta ka shimpor 3-4 snem ban pyndep bad shongdor ruh haduh 1600 tyngka, kumta lada u wan haka thong un buh da ka por ban pyndep ia kane ka bynta.

Katba jingpynbeit pud Assam Meghalaya bad ka jingshah thombor ki paid nongrep ha ka thain Khanduli, ula kular ban shimkhia ban pynjem ia kane ka jingeh.

U Rioo Sten haba kren ula ong kum u MDC barim uba la jop teng ha u snem 2009 haduh 2018, ula pyrshang ban wanrah shibun ki kam pynroi pynpar hapoh ka Constituency, bad bynrap ba wat hapdeng ka jingshah rem noh ha u 2019 hynrei u khlem shongthait ban ai ka jingiatreilang ryngkat bad u paidbah.

Ka thong jong u ha kane ka kynti ka long ban pyndep ia kiba bun bah ki kam pynroi pynpar bad ka shongsuk shongsain hapoh ka Constituency kaba don haka thain khappud bad ka Karbi Anglong, bad ban iada iaki jaka puta kiba don haka thain khappud Assam.

U Rimilanki Synnah ula ong ka daw kaba pynlong ia u ban iakhun ia kane ka election MDC, ka long ka jingthrang ban shakri ia u paidbah khamtam ia kiba duk ba rangli bad lada u wan haka jingjop un pynskhem iaka jinglong trai halor ka khyndew ka shyiap bad ban pynneh iaka riti dustur.

Katba u Fernando Sumer ula ong, haka jingiaid lynti jong u kum u samla u shem ka Constituency kadei kaba shah iehbein ha baroh ki kynthup naduh ka jingbym biang ki lynti synkieng, ki surok, ka umbam umdih, ki jaka pule nalor kiwei kiwei ki jingeh, bad bynrap ba dei kane kaba pynlong ia u ban rai rangbah ban ieng iakhun ia kane ka election khnang ban wad ki lad ki lynti na ka bynta ban wanrah iaka hok ba ki paidbah ka thain kidei ban ioh.

Ula kynthoh ruh iaki MDC kiba la dep ban pynjop la ar ne lai snem kim don ka jingkitkhlieh na ka bynta ka roi ka par jong ka Constituency.