Thep kyrteng 9 ngut ki kyrtong ka VPP sha ka elekshon KHADC

Syllad | The Rising MeghalayaJanuary 29, 2025

Baroh ki la don haduh khyndai ngut ki kyrtong jong ka Seng Voice of the People Party (VPP) kiba la pyndep ia ka jingthep kyrteng hynne ka sngi 29 tarik Kyllalyngkot na ka bynta ban iakhun ia ka elekshon sha ka Khasi Hills Autonomous District Council (KHADC) ka ban long ha ka 21 tarik u Rymphang.

Kine ki kynthup ia ka Kong Aibandaplin Lyngdoh Nonglait na Mylliem, u Eddieson Kharumnuid na Mawlai, Winston Tony Lyngdoh na Nongthymmai, Seiborlang Warbah na Mawkynrew, Danny Langstieh na Laban, Kitbor Syiem na Nongkrem, Denzil Chen na Jaiaw, Lancaster Marbaniang na Mawphlang bad u Bah Strongpillar Kharjana from Mawkhar-Pynthor.

Haba kren sha ki lad pathai khubor, u Finance Secretary ka VPP u Bah Danny Langstieh u la ong ba shen ka party kan sa pyllait ia ka mat treikam ne ka manifesto jong ka, ka ban pynpaw halor ki mat ia kiba yn shim ha kane ka elekshon ADC ka ban wan.

U Bah Danny u la pynpaw ruh ia ka jingsngew skhem ba ka party kan ioh ia ka jingjop ha kane ka elekshon.

“Ngi sngew skhem ban ioh ia ka jingjop ha kane ka elekshon namar ngi iakhun na ka seng VPP kaba ki paidbah ki phaikhmat kum kawei pat ka lad,” ong u Bah Langstieh.

Haba kylli, une u nongialam ka VPP u la ong, “Lada ngin shah jied sha ka District Council, ngin bishar bniah ia ki Ain bapher bapher bad ngin shim ia ki sienjam ba kongsan ban pynkylla lada donkam.”

U la ong ruh ba ka party kan sa iakren ruh halor ka mat kaba iadei bad ka Article 371 bad ka Sixth Schedule sha ka Riti Synshar ka ri India.