Ther ka KSU ia u Myntri halor ka lynti rel, pynkynmaw ia ka jingdawa ILP ha Meghalaya

Syllad | The Rising MeghalayaSeptember 14, 2024

Ka Khasi Students’ Union (KSU) ha ka 13 tarik Nailur ka la ong ba ka jingkam jong u Myntri ka Tnad Food & Civil Supplies u Bah Comingone Ymbon ba ka jingbym don lynti rel ka la wanrah ia ka jingkiew dor jong ki mar ba kongsan kiba wan na shabar ka dei tang ka jingkren da rapjot jong ka jingbym lah jong ka sorkar ban weng ia kane ka jingeh kaba ktah jur ia ki paidbah ka jylla.

 “Kumta lyngba kane une u kyrwoh ngi kyntu ïa ki paidbah ba kim dei ban shah ïalam bakla ha kum kine ki jingkren khlem jingkitkhlieh,” ong u General Secretary ka KSU u Bah Donald V Thabah lyngba u kyrwoh.

Haba pynpaw biang ia ka jingieng skhem jong ka KSU ban pyrshah ia ka jingpyntreikam ia ki lynti rel hapoh Rilum Khasi-Jaintia, u Bah Donald u la ong, “Ka KSU ka la pyrshah ia ka jingthmu ban pyntreikam ia ki lynti rel naduh ka por u Bah Bull Lyngdoh bad ka daw kaba kongsan ka dei namar ba ka KSU kam lah ban pdiang sngewbha ia ki rel katba ki lad jingïada na ka jingwan rung ki briew kiba na bar kim pat don khnang ban khanglad ïa ka jingwan rung kyrthep ki briew kiba na bar sha kane ka thaiñ.”

“Dei na kata ka daw ba ngi la bteng ban dawa ban pyntreikam noh ïa ka Eastern Bengal Frontier Regulation 1873 lane ia ka Inner Line Permit (ILP),” u la bynrap.

Une u nongialam ka KSU u pynkynmaw ruh ia ka jingiakhih pyrshah lynti rel ha u snem 1989 bad ka jingiakhih biang ha u snem 2017 ha kaba ka North East Frontier Railways (NEFR) ka sdang ban shna ia ki lynti rel na Tetelia sha Byrnihat. Haduh palat 40 ngut ki dkhot ka KSU ki la shah kem. Katkum ka jingong jong u, ka jingjia ha u snem 2017 ka dei ka nuksa bad ruh ka jubab ïa ka sorkar ba ka KSU kan ym artatien ban leh da kaba tyngeh lada ka nud ban pyni da ka bor halor ka lynti khlem da pyntreikam ïa ki lad jingïada ban khanglad na ka jingwan rung kyrthep jong ki briew kiba na bar kum ka ILP.