Ther ka VPP ia u Bah Adelbert ba saphriang ka video; kynnoh ba don kiba aijingtip sha ki nongialam NPP

Syllad | The Rising MeghalayaFebruary 14, 2025

Ka Voice of the People Party (VPP) haka 13 tarik Rymphang ka la ther tyngeh ia u MLA ka North Shillong u Bah Adelbert Nongrum bad ka kynhun jong u hadien ka jingmih jong ka jingkren ha ka video kaba la saphriang kaba pyni ba baroh kiei kiei kim long kiba iaid beit iaid ryntih hapoh ka party.

Ha kane ka video ba la pyllait ha ka 12 tarik Rymphang, u Bah Adelbert lem bad ka kynhun jong u la iohi ba ki la kynnoh ia ki katto katne ki briew hapoh ka party ki la thaw ia ka ‘system’ bad pynshai ba balei ba ym shym la iohi hangno hangno ruh ia ka North Shillong ba kan iashim bynta ha ki kam jong ka party khamtam ha ka jingpynkhreh ia  kane ka elekshon Autonomous District Councils (ADC) kaba dang iaid shakhmat.

“Kaei kane kaba phi pyrshang ban leh? Pule ia kaei kaba ngi la thoh sha ka party ba ngi kwah ban pynbeit ia ka jingbym iasngewthuh jingmut. Hooid, ka party ka la shim ia ka rai bad ngi long lakloi ban pdiang hynrei ka party ka hap ban sngewthuh ba ka la shim ia ka rai kaba bakla. Ngi la ong ba ka rai kaba bakla kaba phi la shim, ngi long kiba kloi ban ithuh, bad ngi ruh ngi la leh bakla watla ngim dei ka bynta jong ka jingshim rai. Ngi la long kiba la pynkhreh ban pynrit ia lade. Baroh ki la kylli ba balei ym shym la iohi ia u bah Adelbert Nongrum hangno hangno ruh? ong u nongaiktien jong ka kynhun ba la ialam da u Bah Aderlbert haba kren ha katei ka video.

Haba kynthoh jur ia kane, u Nongaiktien ka VPP u Bah Batskhem Myrboh u la shim ia kane ka jingleh jong u Bah Adelbert kum ka jingthmu ban pynpait pynpra ia ka party.

Hynrei, watla katta u la kam ba ka VPP ka long kaba skhem pura namar dei tang u Bah Adelbert marwei uba la ialeh pyrshah ia ka party. “Kam don kano kano ka jingiapait iapra hapoh ka party namar u don tang uwei uba pyrshah ia ka party bad uta u dei u Bah Adelbert Nongrum,” u la ong.

Haba pynpaw halor ka jingai tiket jong ka party ha Jaiaw constituency, u Bah Myrboh u la kynnoh ba u Bah Adelbert u la khot ia baroh kito kiba la shah kyntait ai tiket bad ong, “I kumba ki ia sylla pyrshah ia ka party.”

“Ka jingkylli kaba mih ka long la ki paidbah kin shaniah ia ka party kaba ieng tylli, la ki shaniah ha baroh ki dkhot jong ka State Executive Committee (SEC) kiba iatylli lait noh tang uwei u MLA lane la ki paidbah kin pynsngap ia ki katto katne ki kynhun kiba iaid pyrshah ia ka party? La phin kyrshan ia kito kiba iasylla bad aijingtip sha ka NPP bad kiba aijingtip ia ki kam ba hapoh jong ka VPP sha ki nongialam ka NPP,” u la buh jingkylli.

Haba ther shuh shuh ia u Bah Adelbert, une u nongialam ka VPP u la ong,” U MP ka Shillong bad General Secretary ka party u Bah Ricky AJ Syngkon u la phah ia ka shithi sha baroh ki sawngut ki MLA da kaba kynthup ban pyntreikam hok ia ki skhim jong ki. Ngi pyrto ia ki laingut ki MLA kiba la burom ia ka shithi jong ka SEC da kaba pynthikna ia ka jingkhuid jingsuba ha ka jingpyntreikam ia ki skhim MLA, hynrei ki paidbah ki la buh jingkylli balei uwei na ki MLA u iapher na kiwei pat ha ka rukom pyntreikam ia ki skhim (da kaba ym don mon ban pyntreikam ia ki skhim ha ka lynti kaba shai bad khuid)”

“Kane kam dei ka sien kaba nyngkong (ba u la thaw ia ka drama). Haba ngi la rai ban pynieng ia u Bah Ricky AJ Syngkon, une u juh u briew u la buh jingkylli halor ka rai jong ka party ban pynieng ia u Bah Ricky, hynrei ha katei ka por ngim kwah ban pynpaw pyrthei ia ki kam iing jong ka party,” u la bynrap.

Katkum ka jingpynpaw ka jong u, u Bah Adelbert u la pynpaw ruh ha ka party ba u kwah ban iakhun ia ka elekshon MDC, kata watla um shym la pan tiket. U la ong ruh ba kam don satia kano kano ka jingiapait iapra hapoh ka party, hynrei ka don ka jingpyrshang kaba napoh ban thombor ia ka party.

Haba kylli, u Bah Myrboh u la ong ba ka party kam don kano kano ka jingthmu ban beh iano iano ruh hynrei ka pyrshang ban wan sha ka jingiasngewthuh jingmut bad ki. “Haduh mynta ngim pat shym la shim ia kano kano ka ri ban beh iano iano ruh namar ngi kwah ban pyniatylli ia ka party,” u la ong.

Shuh shuh, u Bah Myrboh u la ong ruh ba u bah Nongrum u la wanrah shibun ki Bill hapoh ka iingdorbar thaw ain ka  jylla kiba long pyrshah ia ki nongrim bad ki rukom pyrkhat jong ka party.

Kumjuh ruh u la ong ba u bah Nongrum u la ai ia ki jingai jingmut halor ka State Reservation Policy kiba long pyrshah ia ki jong ka party.