Ther ki nongialam ka NPP iaka VPP ba phiel ban sei iaki sakhi satar halor ka kynnoh bamsap

Syllad | The Rising MeghalayaFebruary 18, 2025

U nongialam ka NPP na Mawphlang konstitwensi u bah Auspicious Lyngdoh Mawphlang ha ka sngi Nyngkong u la ther tyngeh ia ka liangpyrshah ka Voice of the People Party (VPP) namar ka jingbym lah ban ai ia ki sakhi sabut kiba donkam ban pynshisha ia ki jingkynnoh bamsap jongka pyrshah ia ka sorkar jylla ba la ialam da ka NPP.

U Bah Auspicious ula ong ka VPP kala kynnoh ba ka sorkar ba la ialam da ka NPP ka dei kaba bamsap, hynrei kine ki dei ki jingkynnoh kiba khlem nongrim namar ba kim shym la lah ban ai ia ki sakhi ban pynshisha ia ki jingkam jong ki.

Haba kren shuh shuh ha ka jingialap elekshon ha iew Pynursla na ka bynta ban pan jingkyrshan ia ki kyrtong jong ka party – Ka kong Grace Mary Kharpuri na Nongshken bad Rahboklang Tynsong na Langkyrdem-Laitkroh ula ong “Watla hapdeng ki jingkynnoh khlem nongrim jong ki, ngim shym la iohi ba ka VPP kan ujor wat tang kawei ka PIL ne FIR pyrshah ia kano kano ka tnad ne myntri ha baroh ar tylli ki sorkar MDA I bad II,” bad bynrap ruh ba kane ka long namar ba kim don satia ki sakhi ban pynshisha ia ki jingkynnoh jong ki pyrshah ia ka sorkar NPP.

Dei ka NPP kaba la shim iaka jingkitkhlieh ban mynjur ia ka Resolution ban kyntu ia ka sorkar pdeng ban pyntreikam ia ka ILP, ka jingpynrung ia ka ktien Khasi. Hato ym shym la leh ia kane na ka bynta ka jaidbynriew, la kylli u Bah Lyngdoh.

Na ka liang u Egenstar Kurkalang u la ong, “Ka VPP ka tbit bha ban kynnoh bamsap ia kiwei hynrei kim shym la ai kano kano ka report halor ka pisa kaba ki lum na ki paidbah ha man la ki jingialang paidbah. Hato phi la ioh kaiphod halor kane?

Ula ong ba ki tbit bha ban thombor ia kiwei watla ka sorkar ka shimkhia ban peit ia man la ki jingdonkam jong ki nongshong shnong, naka kam sam rashon, skim, umbam umdih bad kiwei kiwei.”

Ula ong ruh ba ka Pynursla ka la sakhi ïa ka jingroi kaba khraw ha kine ki 7 snem ba la dep bad ym lah ban ïanujor ïa ka jingroi jingpar kaba ka ïoh mynta bad ki snem ba la dep. Kumta, ula kyntu ïa ki paidbah ba kim dei ban sngap ïa ka party, kiba tbit tang ban kren.