Ther kylla ka BJP Mahila ia ka jingkynnoh u Bah Shangpliang pyrshah ia u president

Syllad | The Rising MeghalayaSeptember 8, 2023

Ka State BJP Mahila Morcha ka la ther kylla pyrshah ia u Bah HM Shangpliang halor ki jingkynnoh bym don nongrim jong u pyrshah ia u president ka party u Bah Ernest Mawrie.

Ka Mahila lyngba u kyrwoh ka la ong ba ka jingkynnoh noh shiliang jong u Bah Shangpliang MLA barim ka Mawynram pyrshah ia u president ka dei ka bym shisha bad ka bym don nongrim, bad ka dei ruh ka kam iasylla jong u ban pynksan halor kane ka jingmih noh ka jong u na ka party d kaba kynnoh ia kiwei pat.

Nalor kata ka la ong ruh ba u Bah Shangpliang u la pynmih ia kiba kum kine ki juh ki jingkynnoh haba u la mih noh na ki artylli kiwei pat ki party sain hima tang naduh une u snem ba ladep na ka bynta ki jingioh nong ha ki kam sain hima bad um ju kut ban wad ia ki pyntha ba jyrngam.

“U President jong ngi u la thung ia ka Kong Susuki Pariat kum ka president jong ka BJP State Mahila Morcha bad ia ka  State Mahila Morcha Executive Committee la thung da ka president ha ryngkat ka jingiamir jingmut lang bad ki nongkitkam, kata katkum ki riti treikam ne constitution jong ka party ha ka 3 tarik Naitung 2023, bad ym da u Bah Ernest Mawrie president kumba la kynnoh da u Bah Shangpliang.

Ka president ka BJP Mahila, ka kong Susuki Pariat ka la pynshai ruh ba laingut ki General Secretary jong ka Mahila Morcha ki dei kiba la shah jied katkum ki kyndon ha kaba ka Kong Dakaniwan Shullai ka la shah thung kum ka General Secretary kaba kongsan ban shim ia ka jingkitkhlieh ban khmih bad pynkhreh ia baroh ki kaiphot kiba donkam, katba ka Kong Matilda Kharbuki bad ka Kong Grace Lanong ki long ki nongiarap lem na ka bynta jong ka.

Ka Kong Pariat ka la ther tyngeh ruh ia ka jingkynnoh jong u Bah Shangpliang ba u Bah Ernest Mawrie u la thung ia la ka jong ka kurim kum ka general secretary jong ka Mahila Morcha.

Ka la ong ruh ba ka Kong Matilda Kharbuki, general secretary Mahila Morcha ka dei kawei na ki dkhot ba la rim tam jong ka seng BJP bad kaba la pyniasoh sha kane ka party naduh ka por u president barim u Bah Khlur Singh Lyngdoh, kata ha kaba ka la bat ruh ia kiba bun tylli ki post kum ka vice president ka State Mahila Morcha, general secretary bad treasury hapoh ka jingkhmih u president barim u Bah Shibun Lyngdoh.

Kumta ruh ka la ong; “Kumno ka jingthung ia ka dkhot ba la rim ka Kong Matilda Kharbuki kan dei kata ka jingshah liang kumba la kynnoh da u Bah Shangpliang?”

Shuh shuh ka la ong ba baroh ki dkhot ka EC ka State Mahila kim shym la shah jied ha u Bah Ernest Mawrie president kumba la kynnoh da u Bah Shangpliang uba don ia la ki jong ki jingthmu kiba sha lyndet.