Ther tyngeh ka BJP Meghalaya ia ka jingleh kam poh u MP ka TMC

Syllad | The Rising MeghalayaDecember 22, 2023

Ka Seng BJP Meghalaya haka 21 tarik Nohprah ka la mih ban ieng pyrshah bad pynrem jur halor ka kam poh bad ka kam pynthohbria jong u MP ka TMC u Kalyan Banerjee pyrshah ia u Vice President ka Ri India u Jagdeep Dhankar hapoh parliament, ha kaba katba u Kalyan u dang pyrthuh bud ia u Vice President na ka liang u Rahul Gandhi u nang ringdur ia kane ka jingleh kam poh ka jong u.

“Ki dkhot ka BJP da kawei ka sur ki pynrem jur ia kane ka kam poh jong une u MP ka TMC,” ong u nongaiktien ka BJP Meghalaya u Bah Mariahom Kharkhrang.

U la ong ruh, “Ngi lum hangne ym dei tang kum ka dak ka jingpyrshah ia kaei kaba jia hynrei ban pynsgew sha u Vice President bad ka ri India baroh ba ngim sngew iahap ia kaba kume kane ka jingleh.

U la ong ruh, “Baroh ki don ia ka hok laitluid ban kren bad pynpaw hynrei ngi dei ban kynmaw ia kawei,ba ngi dei ban don nongrim ban kren da ka jingkitkhlieh, bad ym ban shu kren klumar ne pyrthuh bud kumba ju leh ka liang pyrshah na ka por sha ka por.”

“Ka jingthmu jong ki MP ka liang pyrshah ban kren bein ia u Myntri Rangbahduh (PM) ka ri ka pynlong ia ki dkhot ban kren tam pud ha kane ka kynti,” u la bynrap.

“Ka jingmut jingpyrkhat jong ki ka la poi shaduh u pud ba kim sngewthuh shuh ban pyniapher ia ka jingpyrshah bad ka jingpynthohbria bad kane ka pynlehrain ia ka ri hi baroh kawei kat haduh ba la ithamula ban peit ne ban sngap,” ong shuh shuh u Bah Kharkhrang.