Ther tyngeh ka TMC ia ka sorkar NPP bym lah ban pyntreikam iaka MRSSA

Syllad | The Rising MeghalayaJuly 17, 2024

Ka liang pyrshah All India Trinamool Congress (AITC) ha ka 16 tarik Naitung ka la ther tyngeh ia ka sorkar MDA ba la ialam da ka NPP halor ka jingkynnoh ba ka la pynslem ban pyntreikam ia ka ain ka ban khanglad ia ka jingwan rung jong ki briew kiba na shabar ka jylla, ka Meghalaya Residents Safety and Security Act (MRSSA), 2016.

Ha ka kyrwoh, u president ka state youth ka AITC u Richard Marak u la ong, “Kum u nongshong shnong ka jylla Meghalaya uba don ka jingsngewkhia, nga hap ban kren ia ki jingjia ba dang shen bad ka jingbym leh ei ei  jong ka sorkar ia ki jingeh ba kyrkieh ba ka jylla jong ngi ka iakynduh. Ka jingbym lah treikam jong ka sorkar ba la ialam da u Conrad Sangma bad ka jingklet ban buh hakhmat eh hakhmat ia ki mat ba kongsan ka la wanrah ka jingshaniah hapdeng ki paidbah.”

U la ong ba ka jingshim rai jong ka Khasi Students’ Union’s (KSU) ban leit pynieng hi ia ka khyrdop Inner Line Permit (ILP) ba tehlakam ia ka jingwan rung jong ki briew kiba na bar ka dei ka jingleh hapdeng ka jingkutlad ban pynurlong ia ka jingthmu namar ka jingbym leh ei ei jong ka sorkar. Ka jinglapdien ia kumba 500 ngut ki nongtrei bar jylla ki bym don ia ki kot ki sla kiba biang bad ka jingpynphai pat ia ki spah ngut kiba wan na Assam khlem ki kot ki sla kiba biang ka pynkynmaw halor ka jingpulom jong kane ka sorkar jylla ban shimkhia ia ka jingwan rung kynthep jong ki briew kiba na bar.

“Ka jingpynpaw jong u Myntri Rangbah ka Jylla u Conrad K Sangma ba tang ka Tnad Labour ka dei kaba la ioh bor ban talasi ia ki kot ki sla jong ki nongbylla bar jylla ka pyni halor ka jingbym iadei na ki jingshisha kiba la jia. Lada ka tnad Labour ka la treikam bha, balei ka jingwan tuid jong ki nongbylla sngi kiba na bar bad ki bym pat rejistar ka dang iai bteng?” u la buh kylli.

U Marak u la ong ruh ba ka jingkam jong u CM ba kam ju donkam ia ka work permit, kata lait noh tang ka jingdonkam ban register, ka pynpaw ia ka jingpulom jong ka sorkar ha ki jingpyniaid kam.

U la ong ruh ba kane ka jingpynpaw ka kdew halor ka jingdonkam kyrkieh ban pyntreikam ia ka MRSSA ha ka nongrim jong ka tynrai jong ka khnang ban lah ban shim ia ki lad jingiada bad ban pynkupbor ia ki jaka treikam tynrai.

Nalor kata une u nongialam ka TMC u la ong ba katkum ka MRSSA 2016, ki nongbylla na shabar ka jylla kiba wan trei sha Meghalaya ki dei ban pynrung kyrteng ialade ha ka District Task Force Lane ha ki facilitation centre ba la thaw hapoh katei ka ain. Ka rukom pynrung kyrteng ka kynthup ia ka jingpynshisha ia ki jinglong ba mynshuwa jong ki, ka jaka sah, bad kiwei kiwei ki jingtip. Hadien ba la dep pynrung kyrteng bad pynshisha, ki nongbylla ki lah ban donkam ban shim ia ka permit lane ka syrnot pynrung kyrteng ban trei ha kane ka jylla Meghalaya. Ki nongpyntreikam kiba thung nongtrei na shabar ka jylla Meghalaya ruh ki dei ban pynrung kyrteng ia ki nongtrei jong ki bad ban pynthikna ia ka jingpynshisha jong ki. Ka jingthmu jong kane ka rukom ka long ban pynthikna ia ka jingshngain jong ki nongtrei bad ki nongshong shnong kumjuh.

“Hynrei na ka liang ka sorkar kam shym la thaw ia kine ki District Task Force ne ki facilitation centers, kaba wanrah ia ki jingkylli kiba khia halor ka jingthmu bad ki jingthmu ba kongsan jong ka. Balei ka sorkar kam lah ban pynieng ia kine ki jingtei kiba donkam eh? Kaei ka jingthmu ba shisha ha lyndet jong kane ka jingpynslem? Hato ki shimkhia ia ka jingshngain bad ka bha ka miat jong ki nongshong shnong ka jylla? Kane ka jingbym leh eiei ka pynshisha ba u Conrad Sangma bad ka sorkar MDA ki la pulom jur bad klot ia ki jingthmu ba kongsan”, u la ong.

Shuh shuh halor kine ki jingjia dang shen, u Marak u la ong ba u pynrem jur ia ka jingleh bakla bad jingpynslem jong ka sorkar ba ialam da u Conrad Sangma ha ka ban pyntreikam bad pynkylla ia ka Meghalaya Residents Safety and Security Act (MRSSA).

Nalor kata u pynkynmaw ruh ba la thaw ia kane ka ain ha u snem 2016 hapoh ka jingialam kaba bniah jong u Dr Mukul Sangma, la shna ia kane ka ain ha ka jingiasyllok kaba bniah bad baroh ki nongshim bynta ban iada ia ki trai ri trai muluk jong ngi bad ban pynthikna ia ka jingshngain ha ka imlang sahlang. Hynrei hapoh ka jingsynshar kaba mynta, kane ka ain kaba kongsan ka la iakynduh ia ki jingpynslem ki bym lah ban pdiang bad ki jingpynkylla kiba la pynmih jingkynthoh.