Ther tyngeh u Dr Mukul ia ka Sorkar ba ialam da ka NPP namar ka jingkiew ka jingshim ram

Syllad | The Rising MeghalayaSeptember 10, 2024

U Nongialam ka Liang Pyrshah u Dr Mukul Sangma u la ther tyngeh ia ka sorkar ba la ialam da ka NPP namar ka jingpynkiew ia ka jingshim ram na ka bynta ban siew biang ia ka pisa kaba dei ka trai bad ka sut (principal and interest) ha kaba u la maham ba ka lah ban buh ia ka Jylla ha ka jinngma kaba khraw hadien habud.

Haba kren sha ki lad pathai khubor haka 9 tarik Nailur, u Mukul u la kdew ia kane ka jingshim rai jong ka sorkar ban kyntiew ia ka jingshim ram kum ka ‘lama saw’.

“Ka Sorkar ka dang bteng ban shim ram shuh shuh na ka bynta ban siew biang ia ka pisa kaba la shim ne principal bad interest. Dei hangne ka wanrah ka jingsngewkhia kaba jur bad hangne ba ka sorkar ka la thok la shukor ia u paidbah…Nga pynrem ia kane ka jinglong bad kane kan ialam ia ka jylla sha ka lawei kaba sniew, kata kumba la pynpaw halor ki jingshisha halor ka lama saw ba la ai da ka CAG. Ka dei ka lama saw,” ong u Dr Mukul.

U Dr Mukul u la batai ruh ia kaei kaba la jia ha ka jylla da kaba ai nuksa bad ong, “Lada phi la shim ram na ka bank, phi don ia ka EMI bad mynta phim lah ban siew ia kane ka EMI namar ka jingkamai kam biang satia. Shu buh lada phin hap ban siew T.75,000 bad phi ioh tang 50,000, kumno phin siew ia katei ka 75,000 ka EMI, kumta phi shim ram biang bad phi bteng ban shim ban siew ia ka principal bad ka interest?

“Kane ka dei kaba la jia hangne. Kumta ka jingshim ram bad ka jingbteng ban shim ram ban siew biang ia baroh ki artylli ki principal bad interest da kaba nangpyniar shuh shuh ia ka jingshim ram. Dei na kata ka daw ka CAG ha ka jingpynpaw kaba kham suk bad don burom ka la pynpaw halor ki jingsngewkhia halor kane ka sorkar ba mynta kaba la shlur ban buhrieh ia ki jingshisha bad bteng ban iai kyntait. Kane ka dei kaba hap ban pynrem jur namar ma ngi baroh ngi sngewkhia ia ka lawei jong ka jylla bad khamtam eh haba phi kren ia ka lawei jong ka jylla phi kren shaphang ka koit ka khiah halor ka Pisa Tyngka ne Fiscal Health. Phim khmih lynti ba ki kmie ki kpa jong phi kin bteng ban shim ram bad ban iehnoh pat ia ka jingkit ram ha phi kum ki khun.Kane ka dei kaei kaei kaba ki kmie ki kpa kiba don ka jingkitkhlieh kin ym leh.Kumta ka jingpyniaid ia ka sorkar ruh ka long kumjuh,” ong une u nngialam liang pyrshah.

Da kaba pynpaw ba ym lah ban kynthup lang ia ka ‘soft loan’ ba la ai da ka sorkar India, une u Myntri Rangbah barim u la ong, “Phi lah ban shim ram na ka sorkar India, ia kaba la khein kum ka ‘soft loan’ ha kaba ka sorkar India ka ai ia phi shibun ka lad ne ka lynti ban iaid da kaba buh ia ka jingmut halor ki jingeh jong ka Jylla.”

“Nga la maham ia ka sorkar jylla haba ki dang thmu ban pynthymmai biang ia ka thong halor ka pisa tyngka bad ka thong kaba iadei bad ka jingsah jong ka ram GSDP. Kane ka dei ka jingdkoh bad kaba pynpaw ia ka jingbym don ia ka jingkitkhlieh ban pynthikna  halor ka jingbiang ha ka liang ka pisa tyngka, kaba mut ruh ba ka don ka jingthmu kaba sha lyndet naduh ba sdang.Kane ka dei kaei kaei kaba nga la dep ban kdew ha ki snem kiba la dep ba ka dei ka kam iasylla kaba la pynkhreh bha. Mynta ki don bun ki kam beain bad ki jingdkoh, kata la ka jng halor ka kam tih dewiong bad kiwei pat ki jingleh beain jong ki halor ka jingthung kam ha ki jaka kiba lait,” u la ong.

Ha kajuh ka por une u nongialam ka TMC haba ban jur halor ka jingdonkam ban bud beit ryntih ia ki kyndon jong ka  Meghalaya Fiscal Responsibility and Budget Management (MFRBM) Act, 2006, u la ong, “Ka la don ka jingpynkylla bad ka sorkar ka la thaw ia kane ka kyndon ban ailad ia ki ban shim ram kham bun, kumta ki la ong ruh ba ka dei kaba shah katkum ka ain, hynrei nga iathuh haphi ba baroh, na ka liang ka sorkar India kam shym la bishar bniah ia kane bad dei na kata ka daw ba ki don ki khep ba ki la iaid lait ia ka sorkar India, hynrei ka Fiscal Discipline ka dei ka Fiscal Discipline” u la bynrap shuh shuh.

“Ka thong ha u snem 2018-19 halor ka jingduna pisa ka long 3.25% bad ka jingshisha ka long 6.3% – ka jingiapher kaba khraw. Ha u snem 2019-20, ka long 4.35, ka la kiew sha 4 katba ha ka por jong ngi ka long 3% bad ngi ym ju leit palat 3% halor ka jingdonkam ban pynbiang da ka sorkar katkum ka MFRBM, 2006,” ula ong bad bynrap “Phin iohi ba ka thong ka khajna na ka bynta u snem 2021 ka long 5.25%. Phin ym lah ban mutdur na ka 3% sha ka 4-5% – kata ka dei ka jingtreikam jong ki. Hadien ba la pyndep ia ka thong 5.25, ka leit sha ka 4%. Nga ym ju iohi ba kam dei ka jingthmu kaba shai ka long 4-4.5. Hadien ha u snem 2023, ka long 4%.”

“Ynda ki la buh ia ka thong jong ka jingkit ram GSDP ha ka 28% na u snem 2019, 2020, 2021, 2022 – ka thong kaba la buh ban poi haka GSDP lane ka jingkitkhlieh kaba dang sah: GSDP ka long ha ka thong 28% hynrei ka thong jong ka jingduna pisa ka long ha ka jingkylla. Kumta kane ka pynpaw ia ka jingbym sngewthuh kaba bniah bad ka jingbym leh bha ha ka jingpyniaid pisa,” ula ong