Ther tyngeh u Ma Thombor Shiwat iaka jingbam ar maloi ki shnong Border Assam Meghalaya
U Chief Executive Member, Jaintia Hills Autonomous District Council (JHADC) u ma Thombor Shiwat ula ther tyngeh iaki paidbah bad nongialam shnong ha khappud West Karbi Anglong, Assam bad West Jaintia Hills District, Meghalaya halor ka jingbam ar maloi jong ki haki kam pynroi bad kim don ruh iaka jingkitkhlieh ban shimkhia ban pynthikna iaka jinglong trai jylla jong ki.
U Ma Thombor Shiwat ula pynmih ia kine ki ktien haka dorbar lyuir kaba shi sngi kaba long haka sngi Palei haba iashimbynta iaka mat iakren halor ka kam iakhajia pud ka Assam Meghalaya ne ka motion halor ka ‘Inordinate delay in Assam Meghalaya interstate boundary dispute‘ kaba la neh mynta palat 49 snem naduh bala ioh iaka jylla ba pura kaba la wanrah da u ma Dawan Lyngdoh, haka jaka jong u ma Lakhon Dkhar, uba ym lah satia ban wan sha ka dorbar na ki daw bym lah kiar.
U Ma Thombor ula ong ba ïa kane ka kam khajia pud la iakren bun bun sien ha hapoh ka Executive Committee namar ka jingkynnoh baka JHADC kam shym la leh eiei halor u pud u sam. Kumta kane kala pynlong iaka EC ban rai ban rah ia kane ka mat iakren ha dorbar ban ioh iakren ki para dkhot.
“Ki kot ki sla kiba ngi don ngi la phah sha ka sorkar bad namar ba ka kam pud kam sam ka dei ka sobjek jong ka sorkar Jylla ngim lah ban leh eiei, hynrei tang ka jingkyntu bad ka jingkyrpad ba ka sorkar kan pynbeit ia u pud u sam,” la ong u ma Thombor.
Shuh shuh u ma Thombor ula ong “Nga la pynshlur naka por shaka por iaki nongialam shnong jong ki shnong Pnar ha Khappud Assam Meghalaya ban wan shim sanad naka konsil ba kin ioh iaka jingithuh bad kumjuh ban register iaki jaka puta, pynban haduh kane ka khyllipmat ym don satia mano mano ba wan shakhmat ban register iaki jaka puta jong ki.”
U Ma Thombor ula ong “Hadien ba ki wad jingtip bad katkum ka jinglap ka jingshem kiba bun ki shnong ha khappud West Jaintia Hills bad West Karbi Anglong kim shimkhia ban pynthikna iaka jinglong trai jylla jong ki. Ki don ki nongshong shnong ha khappud ki don ar tylli ki EPIC bad ki pdiang ruh iaki kam pynroi na baroh ar ki sorkar jylla bad kane ka jinglong jingman ki nongshong bad nongialam shnong ha khappud ka buh jingeh iaka konsil.”
“Ka konsil kam lah ban pynbeit ia u pud u sam, hynrei ka lah pat ban pynskhem iaki kot ki sla jong ka khyndew ka shyiap lada wan ki briew, pynban kaba sngewsih kalong ba ki shnong khappud hi kim don ka jingkitkhlieh iaka iap ka im bad u pud u sam,” la ther tyngeh u ma Thombor hapoh Dorbar bad bynrap ka jingbym wan shim sanad ki nongialam kalah ban dei ba lada ki ioh jingithuh naka Assam ki ioh iaki jingsiew ban long kita ki Goanbura, katba haka konsil kim ioh eiei bad kane ka lah ban long kawei ka daw.
“Shuwa ba ka jylla kan rakhe iaka jingdap 50 snem, ngi kwah ba sorkar jylla kan pynbeit noh ia u pud u sam ba pura ka Jylla,” ong u ma Thombor.
U Ma Dawan Lyngdoh MDC Mynsngat Khanduli, uba rah ia kane ka motion, ula ong ba kiba bun ki nongshong shnong ha khappud ki mad jingeh hadien ba ka Assam kala iaid shakhmat ban kam iaki jaka ba la trei la ktah da ki nongshong shnong ka Jylla.
Ula ong ruh ba jingthmu jong ka Assam ban tei iaka skul bah university ha Khanduli ruh kan ktah ia shibun ki jaka ki nonshong shnong.
Ula banjur ba sorkar bad ka sorkar pdeng ka dei ban pynbeit ia u pud u sam ban suk u paidbah.
U Ma Aibor Shadap MDC Barato haba shim bynta ha kane ka motion, ula ong ba lada long kaba lah ba baroh ki shnong Khasi Pnar dei ban pynphai biang sha ka Jylla. Ki don haduh 41 tylli ki shnong Pnar kila duh hadien bala mih ka Mikir Hills kiba hap haka eleka Labang Nongphyllut, kaba la jah kyrteng naka kam iakhajia pud.
Kiwei kiwei kiba kyrshan ia kane ka mat ki dei u ma Habahun Dkhar, MDC Saphai uba don bun ki shnong kiba hap iakhajia pud, Brightstar Chyrmang, Richard Sing Lyngdoh.
U Ma Lasky Rymbai Dy CEM, uba la ong ba Executive Committee haka jingialam u CEM ma Thombor kila shimkhia ban pynshlur iaki nongshong shnong ban register iaki jaka puta, hynrei ki paidbah ha khappud kim shim la wan shakhmat haduh mynta.
Shuwa kane ka jingiatai iaka motion la don ka kynta kylli jingkylli kaba la wanrah da u ma Andrew Shullai halor ka jaka bret ñiut bad ka jingiateh ka JHADC bad ka JMB halor ka jaka bret ñiut naduh u snem 2017.
U EM incharge ma Evening Star Teron ula ong ba kala don ka Joint Inspection hapdeng ka tnad Market bad tnad kam khlaw ka konsil ban wad jaka bret ñiut ba paka bad dang hap eksamin iaka report haka EC.
Shuh shuh u Ma Thombor ula ong ha kaba iadei bad jaka ban bret niut ka municipal, ka konsil kala buh kyndon lada dei ha kano kano ka jaka ba kan bret ñiut, hynrei ki dei ban long katkum ka jingiakut bad ka konsil. Ula ong ruh ba iaka jaka bret niut ha Mynkjai la pyndam noh da ka sorkar.
Ha kane ka dorbar la kynmaw burom ruh ia MDC bala khlad u ma Obil Kyndait uba la khlad haka 16 tarik Naitung 2021. Baroh ki nongkren kila ai ka jingiaroh bad kila pynpaw ba une u rangbah ula noh shibun u synniang u bynhei sha ka konsil haka jinglong MDC haka 6 samoi naduh snem 1973 haduh u 2014.
Ia kane ka dorbar la pynkut noh mynta hi ka sngi bym don kiwei kiwei ki mat iatai.
Facebook
Instagram
Youtube
Twitter
Ka jingsngewrem na ngi ki nongshong Shnong khappud bad ka Assam halor Ka jing kynnoh u CEM JHADC:
Ka jing kynnoh u CEM badon Burom ba don ki Shnong Pnar ba bam Armaloi haba iadei bad ki Shnong ba markhap bad ka West Karbi Anglong ka long ka ba sngew Jah Burom is ngi ki nong shong Shnong ba don border bad ka Assam. Nga kum u Wei na ki nongshong Shnong ha kine ki thain bad ba iadon bynta Lem ha ka kam Shnong kam thaw nga dap da ka jingsngew ktah ba Kat u CEM u kren ia kum ki tei ki kyntien, Balei ba Kat u CEM u aidaw da ki daw ki bym shong nonrim bad shongnia. Ma ngi kiba shong ba sah shakane ka thain lei ngi kwah eh ba ki nongialam jong ngi kin shimkhia hynrei pynban ki wan ban aidaw da ka bym shongnia kum u nongialam Jong ka Council. Kynmaw phi kum u nongialam phi kren ia kum kine ki mat kiba ktah iaka jingsngew jong ngi.Ngim kwah ban leit sha Assam ko CEM JHADC kum ba kynnoh ma ph, kiei Kita ki kam pynroi ba ngi pdiang ma ngi lei ngi dang ia pyrshah naka por Sha ka por imat phim ju bna ei ei shaphang ka jing pyrshah Jong ngi haba iadei ka jingshna surok ka Assam hapoh u pud u Sam ka Meghalaya,Ko CEM badon Burom ngim kwh ban don bynta lane ban rung sha Assam ka jingkren jongphi ka pyni ba phim dei u nongialam ba kit ba bah iaka jaitbynriew. Ngi kwh ba u CEM u dei ban pynthikna shuwa hashuwa ba in kren namar kane ka ktah is ngi ki nongshong Shnong