Ther u Bah Ardent ia ki MLA ba kynthoh sniew halor ka mat ‘Reservation Policy’

Syllad | The Rising MeghalayaAugust 29, 2024

U President ka liang pyrshah Voice of the People Party (VPP) uba dei ruh u MLA ka Nongkrem u Bah Ardent M Basaiawmoit haka 29 tarik Nailar u la ther tyngeh ia ki katto katne ki MLA na kiwei ki party sain pyrthei halor ki jingkynthoh sniew pyrshah ia ka party jong u.

Haba wanrah ia ka call attention hapoh ka Iingdorbar halor ki jingkynnoh thungkam ia kiba haiing bad ia ki briew kiba don jingiadei ha MPSC, u Bah Ardent u la ong ba ka VPP ka la kren halor ka mat kaba iadei bad ka bhah thungkam thungjam (Job Reservation Policy) ym ban pynbiej ne ialam bakla ia ki samla wad kam wad jam kumba la mut sniew da ki katto katne ki dkhot ka iingdorbar.

 “Ngim ju leh satia ia kiba kum kine ki kam sain pyrthei,” u la ong.

 “Nga sngew sammut ha kaba iadei bad ki katto katne ki MLA, kiba la shu phaikhmat bad pynleit jingmut beit tang ia ka VPP. Nga sngew ba ki dei ban pdiang ia ka jingshah rem bad ia ka rai jong u paidbah. Ka jingpyrkhat sniew ka jong ki pyrshah ia ngi ka dei ka jingkhein troin ia ka jingstad jong u paidbah kiba la ai ia ka jingkyrshan kaba pura ia ka party ha kane ka elekshon Lok Sabha kaba la dep,” ong u Bah Ardent da kaba bynrap, “U MP uba jop na ka party jong ngi um dei satia tang u MP ka VPP, u dei u MP uba mihkhmat ia ka Shillong Constituency. Ngi kwah ban iohi ba kan don ka jingiatreilang hapdeng u MP bad ka sorkar Jylla khnang ba ngin lah ban buddien ia ki project kam pynroi.”  

Haba kyntu halor ka jingdonkam ban klet noh ia ka kam sain pyrthei hadien ka elekshon, u Bah Ardent u la ong, “Kane ka dei ka khubor kaba jam bad kaba shai pyrshah ia kito kiba ju pyrkhat sniew pyrshah ia ka VPP.”