Ther u Bah Ardent ia u CM ka Assam ba tuklar sha Meghalaya; ki paidbah ki jied MP ym halor ka niam
U President ka Voice of the People Party (VPP) u Bah Ardent M Basaiawmoit haka 7 tarik Jylliew u la ther tyngeh ia u Myntri Rangbah ka Assam, u Himanta Biswa Sarma halor ka jingwan tuklar shapoh Meghalaya bad halor ka jingkynnoh ba ka niam ka dei ka daw jong ka jingshah rem ka NDA ha kane ka ilekshon Lok Sabha kaba dang shu dep.
Haba pynrem jur ia kane ka jingkren u CM ka Assam, u Bah Ardent u la ong, “Kane ka dei ka khubor kaba Nga kwah ban ai sha u Himanta uba ju kren lamwir bad ba um dei ban wan tuklar ia ka kam jong kiwei hynrei ban khmih ia la ka jong ka kyrpong. Um don hok satia ban wan tuklar ia ki kam jong ka Jylla Meghalaya ha kaba iadei bad ka ilekshon kaba dang shu dep shen.”
![](https://www.syllad.com/wp-content/uploads/2024/09/JIT-Vacancy-823x1024.avif)
“Ha ka ri synshar paidbah kum ka India, ki paidbah ka Meghalaya ki don ia ka hok ban jied ia kino kino ki briew katba ki dang dei hi ki nong India bad kiba lah ban long ki kyrtong. Ki nongshong shnong ka Meghalaya kim dei kiba biej bad ki ban ym tip ia ki jingthmu, ki thong bad ki mat treikam jong ki party sain pyrthei kiba iashim bynta ha kane ka ilekshon. Kumjuh kum ki nongshong shnong jong kane ka ri synshar paidbah, ngi don ia ka hok laitluid ban jied ia kano kano ka party kaba ngi mon,” u la ong.
Da kaba pynpaw ba ki kynhun niam ne balang ha Meghalaya kim ju tuklar ha ki kam ilekshon, une u nongialam ka VPP u la ong, “Watla katta kum ki nongshong shnong, ngin jied ia ka party ne kyrtong kiba ngeit ha ki riti synshar khadar ne constitution jong ka ri India, kaba ngeit halor ka jingburom ia baroh ki jait niam bad ka party kaba iada ia ki hok jong ki rit paid.
Kumta ruh u la ong, “Phim lah ban khmih lynti ba kum u Khristan, Ngan vote ne jied ia u briew uba dei na ka party kaba ieng pyrshah ia ki riti synshar ri, ka bym burom ia kiwei pat ki niam bad ruh kiba buh jingma ia ki ri paid hapoh ka ri, bad kane ka dei ka hok jong ki nongshong shnong ba kin rai.”
“Kumta Nga pynrem jur ia kane ka jingkren jong u Sarma ka bym don ruh ia ki jingshisha, ka bym don nongrim bad kaba pynsngew iapher niam. Ka jingkren ka jong u ha nga hi ka dei tang ban ialam bakla ia ki paidbah bad ban wanrah ka jingsngew iapher hapoh k ri. Nga thikna ruh ba kane ka jingkren jong u ka la wanrah ka jinglehrain ia ki nongshong shnong ka Assam bad ka la ktah jur ia ka jingsngw jong ki paidbah ka Meghalaya,” ong shuh shuh u nongialam ka VPP.
Leave a Reply