Ther u Bah Passah ba pyndonkam ia ka Trading by Non-Tribal Regulation tang ban lum khajna ym ban iada

Syllad | The Rising MeghalayaJanuary 29, 2025

Ka Khun Hynniewtrep National Awakening Movement (KHNAM) ka la ther tyngeh ia ki Executive Committees (EC) ba la ialam da ki seng sain pyrthei bapher bapher hapoh Khasi Hills Autonomous District Council (KHADC) halor ka jingkynnoh pyndonkam ia ka Trading by Non-Tribal Regulation, 1954 kum ka jaka pynmih bad lum khajna ha ka jaka ban iada ia ka khaii pateng jong ki riewlum jong ka thain.

Ia kane la pynpaw da u Working President ka KHNAM u Bah Thomas Passah haba synran lang ia ki lai ngut ki kyrtong ka party kiba la pyndep ia ka jingthep kyrteng hynne ka sngi 29 tarik Kyllalyngkot ha ISBT, Mawiong, kata kiba kynthup ia u Bah Pynshai Mawrie na Mawkynrew, Ericton Swer na Nongthymmai bad u Bah Raymond Basaiawmoit na  Mawkhar-Pynthorumkhrah.

Haba kren sha ki lad pathai khubor, u Bah Passah u la ong, “Ka jingthmu jong ka Trading by Non-Tribal Regulation, 1954 ka long ban iada ia ka khaii ka pateng jong ki riewlum, hynrei kaba sngewsih ka long ba ha kine ki 73 tylli ki snem kiba la leit noh, ki party sain pyrthei kiba la wan ha ka bor ha KHADC kim shym la pyndonkam ia ka kum ka lad jingiada hynrei ban pyndonkam kum ka jaka pynmih khajna da kaba ai laisen khaii pathar sha ki briw kiba dei ki bar jylla.

“Kumta lada ngi wan ha ka bor hapoh District Council, ngin pynthikna sha ki paidbah ka thain ban wanrah ia ki jingkylla kiba donkam ban pynlong ia ka Trading by Non-Tribal Regulation kaba kham treikam khnang ban iada ia ka jingim jong ki riewlum da kaba pynduna ne khanglad ia ka jingai laisen khaii sha ki bar jylla,” u la pynthikna.

U Bah Passah u la kdew ruh ba kane ka Regulation ka la don tang ha District council namar ka Sorkar Jylla haduh mynta kam don ain ban iada ia ka khaii ka pateng jong ki riewlum ha ka Jylla.

“Hynrei, watla katta kane ka Regulation ka dang tlot ha ka dur kumba ka long mynta. Kumta ngi kut jingmut ban wanrah ki jingkylla da kaba ai kham bun ki bnai khnang ba kan kham lah ban treikam na ka bynta ban iada halor ki hok bad ia ka bha ka miat jong ki trai ri trai muluk jong ngi ha ka liang ka roi ka par,” u la bynrap.

Haba kylli, u Working President ka KHNAM u la ong ba ka party jong u kan pynthikna ruh ban pynbha bad pynthymmai pura ïa ka KHADC.