Ther u Bah Prestone ia ki kam thok jong ka VPP ha ka jingialap ilekshon ha ka ktem u Bah Ardent ha Smit

Syllad | The Rising MeghalayaApril 17, 2024

U State President ka National People’s Party (NPP) uba dei ruh u Symbud Myntri Rangbah ka Jylla u Bah Prestone Tynsong haba pan jingkyrshan na ka bynta ka kyrtong MP jong ka party Shillong seat ka Kong Ampareen Lyngdoh ha ka jingialap ilekshon ha Smit kaba dei ka ktem jong u nongialam ka Voice of the People Party (VPP) u Bah Ardent Miller Basaiawmoit u la ther tyngeh ia ki kam thok kam shukor jong kane ka party VPP.

Haba aijingkren ha kane ka jingialang u Bah Tynsong u la kyntu ia ki paidbah  ba ki dei ban kyntait shisyndon ia ka VPP namar ka jingpyrshang ban ialam bakla ia ki paidbah lyngba ki kam thok kam shukor ki jong ka.

Une u nongialam ka NPP u la ong ruh ba kane ka dei ka sien kaba nyngkong eh ba u la wan iuhkjat hapoh ka constituency jong u Bah Ardent na ka bynta ka jingialap ilekshon, hynrei u Bah Ardent u la wan sha Pynursla palat ia ka 50 sien kynthih.

“Ka sien kaba khatduh eh ba u (Ardent) u la wan jngoh ia ka Nongshken kaba dei ka MDC constituency jong ka Kong Grace Mary Kharpuri u la kynnoh ba u Bah Prestone bad ka Kong Grace ki donkti ha ki kam bamsap bad ba ka dei ka por ia ki paidbah ba kin jied noh ia ka VPP namar ba ka ieng ha ka nongrim jong ka ‘Clean Politics’ ne ka kam sain pyrthei kaba khuid bad ka synshar khadar kaba khuid. Hynrei, haba uwei u briew u la kylli ia u Bah Ardent naei un sdang ban pynkhuid ia ka sain pyrthei, hynrei u Bah Ardent um shym la lah satia ban jubor,” ong u Bah Tynsong.

U la ong ruh ba u Bah Ardent uba la sdang ia kane ka ‘Clean Politics’ naduh u snem 2013, u dei u juh u briew uba siew ia ki paidbah na ka bynta ban wan sha ka jingialap ilekshon jong ka seng. “Hato phi tharai kane ka dei ka ‘Clean Politics’? Kumta kam long satia kaba suk,” u la bynrap.

Nalor kata u Bah Tynsong u pynkynmaw ruh ia ka jingialap ilekshon jong ka VPP ka iasyriem bad ka jingpyrshang kaba la leh da uwei u nongialap ha u snem 1999 uba la ong ba ka pyrthei kan wai noh ha u snem 2000 bad ki briew kiba ngeit ha u ki la phet sha khlaw bad aiti lut ia lade bad ia ki jingdon jingem bad ka spah ka phew, hynrei hadien 24 snem kitei ki longiing ki la im noh ha ka jingduk ka jingkyrduh.

“Kane ka dei ha kaba kum kata ka por ba la thaw ia kum katei ka party (VPP) ha Meghalaya kaba la pyrshang ban ialam bakla ia u paidbah da kaba ong ba ka jaidbynriew ka la don ha tmier jong ka riat bad kam don shuh ka jingkyrmen. Kane ka dei ka jingialam bkla bad ka jingthok jingshukor. “Ngan iathuh ha phi ba ha ka Mang tyngka ha k por jong u Captain Williamson Sangma kum u Myntri Rangbah ka Jylla bad u Bah BB Lyngdoh kum u Myntri ka Tnat Pla Tyngka, ka Mang Tyngka jong ka Jylla ka long tang T.5000 klur.Mynta ha u 2024, ngi (Sorkar MDA) ngi la wanrah ia ka Mang Tyngka kaba palat T.27,000 klur.Kumta phi tharai ba ka Jylla ka la hiar sha trai, em ka Jylla ka la iaid shakhmat ha ka liang ka roi ka par bad ha baroh ki liang,” ong u Bah Tynsong.

“Nga sheptieng ba kum kine ki party ki pyrshang ruh ban ialam bkla ia ki samla da kaba kyntu ia ki ba kin pyniasoh sha kane ka kynhun khnang ba kin ioh ia ki kam sorkar, hynrei Nga la long u MLA mynta la bun phew tylli ki snem, Ngam pat ju pynmih ia kiba kum kine ki jingkular sha ki paidbah,” u la ong.

Haba pynpaw ka jinglyngngoh ba ki paidbah ka Nongkrem kim shym la vote ia u MLA barim u Bah Lambor Malngiang ha ka ilekshon Assembly 2023, u Bah Tynsong u la ong, “Ki paidbah ki la khot ia u Bah Ardent da u Boss, hynrei nga ong ba kam long kaba don jingmut lada phim don satia ha ka liang synshar. “Nalor kata u la ther tyngeh ruh ia u Bah Ardent halor ka jingbym don jingkitkhlieh na ka bynta ban wanrah ia ki kam pynroi hapoh Nongkren constituency.

“Haba u (Ardent) u kanbas u ong sngewbha vote ia nga khnang ba ngan wanrah ia ki kam pynroi, hynrei mynta haba phi la shah jied phi kylla ktien bad ong pynbna ba ka dei ka kamram jong u Bah Prestone, Sniawbhalang Dhar bad Kong Ampareen Lyngdoh ban wanrah ia ka roi ka party ha ka constituency jong phi?” ong u Bah Tynsong.

U Bah Prestone u la ong ruh, “Dang ha kine ki ar bnai ba la dep, ka Kong Ampareen ka la wan jurip ia ka PHC ha Nongkrem, phi (Ardent) ong ym don shuh kum ka Kong Ampareen, hynrei ha ka por ilekshon, maphi bad ki nongkyrshan jong phi phi la kynthoh pyrshah ia ka da kaba pynmih ruh ia ki ktien kiba khot pyrshah ia ka.”

Kumta na ka liang u Bah Prestone u kyntu jur ia ki paidbah ka Nongkrem constituency ba kin vote ia ka NPP namar kan long ka burom kaba khraw na ka bynta ki paidbah ka Ri Lum Khasi Jaintia lada ka Kong Ampareen kan shah jied kum ka MP sha parliament namar kan mihkhmat ban pynsawa ia ka sur jong u paidbah.