Ther u CEM ka JHADC ia ka VPP ba shim kabu halor ka jingpyllait tulop sha ki nongtrei ka council

Syllad | The Rising MeghalayaSeptember 30, 2024

U Chief Executive Member (CEM) ka Jaintia Hills Autonomous District Council (JHADC) u Ma Thombor Shiwat ha ka 30 tarik Nailur u la ther tyngeh iaka liang pyrshah Voice of the People Party (VPP) halor ka jingpyrshang ban shim kabu halor ki sienjam jong ka Executive Committee ban pynioh pisa na ka bynta ban pyllait ia ka tulop kaba hynniew bnai kaba dang sahteng jong ki nongtrei ka Council.

Haba kren sha ki lad pathai khubor u Ma Thombor u la ong ba ka VPP kam dei satia tang ka seng sain pyrthei, hynrei kum ka kynja sengbhalang, kata da kaba kdew ia ka jingiakhih ba dang shen jong ki halor ka jingpynslem ha kaba iadei bad ka jingpyllait ia ka tulop ba sahteng jong ki nongtrei ka council.

U la kynthoh ruh ba kane ka jingiakhih jong ka VPP ban pyllait noh ia ka tulop jong ki nongtrei ka Council ka la wan long ruh hasdien ba ki la ioh jingtip ba ka Sorkar Jylla shen kan sa pyllait noh ia ka song pisa sha ka JHADC.

“Kumba ka long ka paw ba ka VPP ka la buh da ki katto katne ki briew ki ban lum jingtip halor kane ka kam namar man ka por ba ka Sorkar Jylla ka thmu ban pyllait ia ki song pisa sha ka JHADC, ki briew ka VPP ki ju wan ban pynlong ia ka jingiakhih ban pyni ba dei ka jingshim khia ka jong ki ba la pyllait ia ka song pisa,” u la ong.

“Ka Sorkar Jylla ka la dep pynkhreh ban pyllait noh ia ka song pisa hadien ba ngi la thoh ia ka shithi. Kumta kane kam dei ka jingshimkhia jong ka party Prah, hynrei ka dei ka jingshimkhia da ka EC ka jong ngi ban pynthikna halor ka jingpyllait ia ka pisa na ka bynta ban siew ia ka tulop ba sahteng jong ki nongtrei,” ong u Ma Shiwat.

Katkum ka jingpynpaw ka jong u, ka Council ka donkam kumba T. 6 klur ban siew ia ka tulop ba 7 bnai jong baroh ki nongtrei.

Haba kylli u CEM u la ong, “Ngi khmih lynti ban ioh kumba T. 16 haduh 17 klur mynta ka kynti na ka bhah khajna lyngba ki marpoh khyndew, bad ia kane ka Sorkar ka dang pynkhreh ia ki jingdonkam baroh.”

Da kaba pynpaw ba kine ki jingiakhih jong ka VPP ki dei ki bym don jingmut, u Ma Shiwat u la ong, “Kane ka long namar lada ki VPP ki wan iakhih shi sngi ne man ka sngi ruh, yn pyllait ia ka tulop lada don pisa, hynrei lada ym don pisa ngin ym lah ban leh ei ei.”

Nalor kata u la kynthoh ruh ba kane ka jingiakhih jong ka VPP ka dei tang ka buit pilitics namar la jan ka elekshon MDC.  

“Kam mut satia ba tang namar ka jingiakhih jong ka VPP la shimkhia halor kane ka kam. Lada kim iakhih ruh ka dei ka kamram ka jong ngi ban iakren ia k Sorkar bad ban kyrpad na ka bynta ban pynkloi ban pyllait ia ka bhah,” u la bynrap.