Ther u CM ka Jylla ia u N Biren Singh ba kynnoh ia ka nongrim u PA Sangma halor ka jingjia ha Manipur

Syllad | The Rising MeghalayaApril 1, 2025

U Myntri Rangbah ka Jylla u Conrad K Sangma ha ka 31 tarik Lber u la ther tyngeh ia u Myntri Rangbah barim ka Manipur u N Biren Singh halor ka jingkynnoh ia ka nongrim jong u kpa ba la khlad noh jong u, u Purno Agitok Sangma halor ka jinglong jingman hapoh Manipur.

Na ka liang u Conrad Sangma u la shim ia kane ka jingkynthoh jong u Biren Singh kum kaba sngewkhia bad sngewsih shibun.

Haba leit lyngba ka x.com, u CM ka Meghalaya u la ong, “Ka long kaba sngewkhia bad sngewsih shibun ba u @NBirenSingh u la pynmih ia ka kyrteng jong u (L) PA Sangma. U Sangma barabor u la iakhun na ka bynta ki paidbah ka thain Shatei Lammihngi jong ka ri, bad u la long u nongiasaid uba khlain na ka bynta ki mat bad ki hok bapher bapher jong ki nongshong shnong kane ka thain.”

“Ha kaba kum kane ka por, ka jingpyrshang jong baroh lang ka long ban wanrah pat ia ka shongsuk shongsain hapoh Manipur bad ym ban pynleit jingmut ha ki kam sain pyrthei. Baroh ngi hap ban iatreilang. Sa shisien pat nga kyrpad ia baroh ban trei na ka bynta ka suk ka sain bad ka bha ka miat jong ki nongshong shnong ka Manipur.

Kane ka dei kaba u (L) PA Sangma u thrang bad angnud,” thoh u CM ka Meghalaya.

Kane ka jingkynthoh jong u Conrad ka la wan long hadien ba u N Biren Singh lyngba ka x, u la kynthoh halor ka jingtuklar ki bor kiba na bar halor ka jinglong jingman hapoh Manipur. Ha ka jingthoh kaba la thoh da ki kyntien kiba tyngeh, u Biren Singh u la kam ba u (L) PA Sangma shisien u la aijingmut ban phiah ia ka thain Shatei Lammihngi sha ki jylla kiba kham rit katkum ki kynhun jaidbynriew, ka nongrim kaba ula khot kum ka jingma kaba khraw bad kaba buh jingma halor ka jingiatylli hapoh ka ri. U la maham ruh ba kiba kum kine ki juh ki jingpyrshang la leh ha kane ka kynti kaba mynta ban pynthut ia ka jinglong jingman hapoh Manipur.