Ther u ma Moonlight Pariat iaki kyrtong ba iakhun pyrshah haka common platform ha Khimusniang, kdew iaka jingdawa ban pynkylla iaka Sixth Schedule

Syllad | The Rising MeghalayaFebruary 15, 2025

Ka rynsan ialap paidbah ne ka Common Platform kaba la pynlong da ka Dorbar Shnong Khimusniang na ka bynta ki kyrtong MDC sha ka Jaintia Hills Autonomous District Council (JHADC) na ka Jowai South haka 14 tarik Rymphang, la sakhi ba u Moonlight Pariat kyrtong shimet ne Independence ula pyni iaka jingbit bad jingshemphang bad ula ther tyngeh ia baroh ki kyrtong kiba iakhun pyrshah.

U Ma Pariat kum u riew rim haka politics bad u CEM barim ka JHADC, ula ther ruh ia u kyrtong ka NPP uba la pynpaw ba lada wan haka bor un thaw iaki policy ban pynkhie im iaka konsil, hynrei na kaliang u Ma Pariat ula ong ba ka Para 12 A jong ka Sixth Schedule ka pyniap lypa iaki ain ba thaw ka konsil haba don kino kino ki ain ba iasyriem bad ki jong ka Sorkar Jylla. Ula buh jingkylli pyrshah ia u kyrtong ka NPP K. Dikylsingh Phawa, kumno un thaw iaki ain ki polisi lada ym lah ban pynkylla ne amendment iaka sixth schedule.

Kiwei pat ki kyrtong kiba la pynpaw iala ka jong ka nia ki kynthup ia MDC mynta u Saron Pasweth na ka Congress, K. Dikylsingh Phawa na ka NPP, Iaibatlang Talang na ka VPP bad u kyrtong ka BJP u, Heimonmiter Phawa um shym la wan ban iashimbynta ha kane ka rynsan.

Haba kren shuh shuh ha kane ka rynsan, u ma Moonlight ula kdew ba haka por ba u long CEM ka konsil la dep tyrwa ban pynkylla iaka khyrnit ba hynriew ka riti synshar, pynban kane kala sahkut haka sorkar pdeng. Kane ka jia long namar ki nongmihkhmat ne ki MDC kiba la jied kim lap iaka jingkhang ban tynruh ha Delhi ban pynkylla iaka Sixth Schedule kaba la pynduh jingmyntoi iaka konsil ban pyniaid shakhmat iaka ki kam ki jam jong ka.

Ula kop ruh da kaba ong “Ngam shym la iakhun iaka elekshon ban phon pah bad pynbiej iaki nongthep vote, hynrei nga kren iaka nongrim bad katkum ba kdew haka riti synshar,” bad bynrap “Haba phi jied iaki nongmihkhmat jied iaki ba tip iaka ain ban iasaid na ka bynta ban pynneh pynsah iaka jinglong tynrai bad ka riti ka dustur bad ban iada iaka jaidbynriew.”

“Hynriew snem kila leit, ki nongmihkhmat jong ngi kila leit sha Delhi, hynrei ki wan phai thylli kam shym la urlong kata ka jingpynkylla iaka Sixth Schedule. Nga ngeit skhem ba dei ma nga uba sdang ia kane ka kam bad imat ka dei ka pali jong nga ban leit biang sha Delhi ban kyntu bad tynruh sha Delhi ban pynkylla iaka ain kaba shah ha khmat eh kaba long kum u mawsiang ban pynkubor ban pynkhie rasong iaka District Council,” la ong u ma Pariat bad kynthoh iaki kyrtong ba wat kren pynbiej ban rah iaki skim ki kam pynroi namar ba ka District Council kam dei ka jaka ban rah skim, hynrei ka dei ka institution ne shlem ban iada iaka tynrai bad ka jaidbynriew rit paid jong ngi.