Ther u MP ka Rajya Sabha ia ka VPP, u ong ba ka pyrshah iaka bor dohksah, ka kyrshan iaki kam runar

Syllad | The Rising MeghalayaApril 16, 2025

U President barim ka NPP uba dei ruh u MP ka Rajya Sabha, u Dr WR Kharlukhi haka 15 tarik Iaiong u la ther tyngeh halor ka jingdawa jong ka Voice of the People Party (VPP) ban pynlong da ka jingtohkit kaba laitluid halor ka jingkynnoh bym lah jong ka Sorkar ban pynlong ia ka elekshon JHADC kaba laitluid bad kaba khuid ba suba.

Na ka liang u MP u la ong ba ka party (VPP) ka long pyrshah ia ka jingpyndonkam da ka bor dohksah (muscle power) hynrei ka kyrshan pat ia ki kam runar.

Haba kren sha ki lad pathai khubor, u Dr Kharlukhi u la ong, “Mynta ka sngi nga la ioh ban pule ha ki kotkhubor ba ka VPP ka la dawa ban pynlong da ka jingtohkit halor ka jingshah rem ka jong ki ha ka elekshon JHADC. Kumba ong u MLA jong ngi na Jowai, kine ki briew haba ki shah rem ha ka elekshon ki ong ba ka dei ka jingleh bym hok, hynrei haba ki jop ki ong ba ka long kaba biang.”

Haba kyntait ia ka jingkam jong ka VPP ba ka jingpyndonkam da ka bor dohksah ka dei ka daw bah halor ka jingshah rem ha ka elekshon JHADC, une u nongialam ka NPP u la ong, “Phi tip nga dang don ia ka video halor kawei kaba la jia hadien ka elekshon ha kaba ka iing jong ki nongkyrshan jong ngi ka la ngat ha ka jingshah thombor bad shah ther maw. Ngam iohi ia kine ki briew kiba ieit jaidbynriew, namar ba ka iing jong ki briew kiba shah pynjulor ka dei ka iing jong ki nong Jaintia, kumta ngam iohi satia ba kan don ka jingpynrem na ki nongialam kiba ieit shisha ia ka jaidbynriew.”

“Ki la ong ba ka dei ka bor dohksah, hynrei kane kam dei kaei kaei hynrei ka dei ka kam runar bad kam pyntriem, kata kaba mut ki long pyrshah ia ka bor dohksah hynrei ki kyrshan  ia ki kam runar,” u la bynrap.