Ther u nongialam ka JSU ïa u Myntri Rangbah ba lehklet iaka ishu ILP

Syllad | The Rising MeghalayaNovember 8, 2021

U General Secretary Jaintia Students’ Union (JSU) u Treibor R Suchen ula ther tyngeh ia u Myntri Rangbah ka Jylla u Conrad K Sangma bad kynnoh ba ula leh klet iaka ishu Inner Line Permit (ILP) kaba la dawa la bun bun snem ha Jylla.

Une u nongialam ka JSU ula ong “U Myntri Rangbah ka Jylla u leh klet ban iakren iaka jngdawa ILP bad u Myntri Rangbah duh ka Ri India u Narendra Modi haka  jingkynduh ia u ban khot sngewbha kum u kongsan ha ka jingdap 50 snem ka jylla.”

Haba kren shuh shuh haka jingialang pynkup burom iaki khynnah kiba pass bha kaba long ha District Library Auditorium haka sngi Saitjain, u Treibor ula ong ba haduh mynta namar baka jingbym don iaki aiñ ki ban tehlakam iaka jingwan rung kyrthep ki bar jylla, bun bah ki bar jylla hapoh ka jylla kiba dang iohlad ban bteng iaka kam khaiì pateng hapoh rilum Jaintia bad ym duna da ki hajar ngut kiba ioh lisen na JHADC. Ula buh jingkylli shaei ka lawei ki khun samla lada baroh ki kam ki jam la pyniaid lut da u bar jylla.

Une u nongialam ka JSU ula ong ruh baka ILP ka donkam palat ha kine ki sngi bad na ka liang ka JSU kan iai bteng ban khynra mynder hapoh ri lum Jaintia bad sha kiwei ka jaka hapoh ka jylla katba ka ym pat pyntreikam iaka aiñ ILP ha jylla baroh kawei.

Ha kaba iadei bad ka kam iakhajia pud hadpeng ka Assam bad Meghalaya ha Block 1 bad 2 bad u u Treibor ula ong ba ka JSU ka sorkar ka dei ban pynrung dkhot lang iaki Dalloi, Rangbah shnong, ki MDC na ka thain Block 1 bad katto katne ngut ki riew shemphang ne riew rangbah hapoh ka Regional Committee jong ka sorkar khnang ban iaid beit ka jingpynbeit ia u pud u sam bad ban lait duh ei iaki jaka puta ha khappud Assam.