Ther u nongialam ka NPP ia u president ka VPP halor ka jingkynnoh wad daw wat ia ki nongialam balang

Syllad | The Rising MeghalayaFebruary 8, 2025

U National General Secretary ka National People’s Party (NPP) bad Symbud Myntri Rangbah ka Jylla u Bah Sniawbhalang Dhar u la ther tyngeh ia u President ka Voice of the People Party (VPP) u Ardent Miller Basaiawmoit halor ka jingkynnoh wad daw ia baroh bad khlem da mab wat ia ki nongialam Balang ruh.

Haba kren ha ka jingialang ialap elekshon ban pan jingkyrshan ia u kyrtong ka party na Nartiang-Wahiajer, u Bah Reforming Son Lamare u Bah Sniawbhalang u la ong, “Lada phi peit ha ki social media phin iohi ba u president ka VPP u la wad daw ia baroh. U la wad daw ia ki Rangbah Shnong, bad u la wad daw wat bad ki nongialam balang ruh ..ngim pat ju iohi ia kum kane ka seng sain pyrthei kaba kren shabar jong ka kam sain pyrthei.”

Da kaba pynpaw ba ka don ka jingiapher kaba khraw bha hapdeng ka NPP bad ka VPP, u Dhar u la ong, “Ka VPP ka dei ka party kaba kam ba ka ieit jaidbynriew, hynrei ka NPP ka dei ka party kaba ieit ia ki briew na baroh ki kynhun nongshong shnong. Kata ka dei ka jingiapher hapdeng jong ki bad ngi. Ka NPP ka dei ka National Party katba ka VPP ka dei tang ka State Party ka bym don ia ka jingiohi jngai.”

Haba kyrpad ia ki paidbah ka Rilum Jaitnia ba kin ai ka jingkyrshan kaba pura ia ka party bad ia ki kyrtong jong ka, u Symbud Myntri Rangbah u la ong, “Ka NPP kaba don 33 ngut ki MLA ka la lah ban pynthikna ia ka sorkar kaba skhem.”

“Nga sngew skhem ba ngin jop napoh Nartiang constituency hynrei ngi donkam 15 ngut ban thaw ia ka EC kaba thymmai ha Jaintia Hills Autonomous District Council (JHADC). Kumta Nga kyntu ia ki paidbah ka constituency bad ka thain baroh kawei ba kin ai ka jingkyrshan kaba pura ia ki kyrtong jong ka party,” u la bynrap.

Katkum ka jingong jong u, khlem artatien baroh kin kwah ban shong hapoh ka bus ha ka jaka ban shong halor tnum jong ka.

Nalor kata u la kam ruh ba ka NPP ka la nangkiew bad nang iohbor ha ka jylla bad ka dang bteng ban trei shitom ban pynthikna ia ka jingjop ha kane ka elekshon sha baroh ki artylli ki Autonomous District Councils (ADC) ha Rilum Khasi bad Jaintia.

“Kynmaw ba ka Nartiang ka dei ka ktem ba khlain jong ka NPP. Ngi donkam ban iatylli ban pynthikna ia ka jingjop jong u kyrtong. Nga don ka jingshaniah kaba skhem ha ki paidbah jong ngi kiba la kyrshan ia nga haduh lai samoi kynthih ba kin leh kumjuh na ka bynta u kyrtong jong ngi,” ong u Dhar.

Shuh shuh u kualr ruh ba u kyrtong jong ka party napoh Nartiang-Wahiajer hadien ba u la shah jied un ai ia ka jingshakri kaba bha tam sha baroh ki paidbah ka constituency.